हिमाल प्रेस 
काठमाडौँ- अल नेपाल स्पोर्ट्स फाउण्डेसनले अन्तर्राष्ट्रिय महिला दिवसको सन्दर्भ पारेर ‘वुमन इन स्पोर्ट्स कन्क्लेभ–२०२६’ गरेको छ। काठमाडौँमा भएको कार्यक्रममा स्थानीय जनप्रतिनिधि, खेलकुद निकाय, ओलम्पिक नेतृत्व तथा खेल विज्ञहरूको सहभागिता थियो।
कार्यक्रममा नेपाली खेलकुदमा महिलाको उपलब्धि, चुनौती र अवसरबारे गम्भीर छलफल गर्दै समावेशी तथा सशक्त खेल वातावरण निर्माण गर्नुपर्नेमा जोड दिइएको थियो। साथै खेलकुदमा महिलाले सामना गरिरहेका अवरोधहरू हटाउने, नेतृत्व विकास, लचिलोपन तथा खेलकुदमार्फत आर्थिक सशक्तीकरणका विषयमा व्यापक विचार–विमर्श गरिएको थियो।
कार्यक्रमलाई सम्बोधन गर्दै बागमती प्रदेशकी युवा तथा खेलकुद मन्त्री उर्मिला नेपालले महिला खेलाडीहरूको प्रतिभालाई राज्यले प्राथमिकता दिँदै आवश्यक नीति तथा कार्यक्रम अघि बढाइने बताइन्।
उद्योग वाणिज्य महासंघका पूर्व अध्यक्ष भवानी राणाले महिला नेतृत्व, आर्थिक सशक्तीकरण र खेलकुदबीचको सम्बन्धबारे चर्चा गर्दै खेलकुद पर्यटनको विकासमा निजी क्षेत्रको सक्रिय सहभागिता आवश्यक रहेको बताइन्।
राष्ट्रिय खेलकुद परिषद्का कार्यकारी सदस्य सुवर्ण श्रेष्ठले राष्ट्रिय खेलकुदको विकासका लागि सबै सरोकारवालाबीच सहकार्य आवश्यक रहेको उल्लेख गर्दै यस्ता कार्यक्रमले एकताको सन्देश प्रवाह गर्ने बताए।
निर्मला फाउण्डेसनका अध्यक्ष निर्मला भण्डारीले अपांगता भएका व्यक्तिहरूका लागि अनुकूलित खेलकुदको महत्वबारे प्रकाश पार्दै समावेशी खेल संरचना विकास गर्नुपर्नेमा जोड दिइन्।
मोटरस्पोर्ट्स खेलाडी प्रज्ञा कँडेलले आफ्नो खेल यात्रा सुनाउँदै महिलाले निरन्तर मेहनत र साहसका साथ अघि बढेमा अन्तर्राष्ट्रिय स्तरमा पनि सफलता हासिल गर्न सकिने बताइन्।
कार्यक्रमको मुख्य आकर्षण ‘बाधा हटाउँदै स् खेलाडी यात्रा र लचिलोपन’ शीर्षकको प्यानल छलफल थियो। पहिलो सत्रमा राष्ट्रिय टोलीका चर्चित महिला खेलाडीहरू दिपा शाही (फुटबल), पुजा महतो (क्रिकेट), सुमित्रा रेग्मी (भलिबल), ओलम्पियन सन्तोषी श्रेष्ठ (एथलेटिक्स) तथा कराते खेलाडी आरिका गुरुङले आफ्नो खेल यात्रा, चुनौती र सफलताका अनुभव बाँडेका थिए।
उनीहरूले समाजिक धारणा, पारिवारिक दबाब र पूर्वाधार अभावजस्ता कठिनाइका बाबजुद निरन्तर अभ्यास र आत्मविश्वासले सफलताको बाटो खोल्न सकिने अनुभव सुनाएका थिए।
प्यानलको दोस्रो सत्रमा नेपाल ओलम्पिक कमिटीका अध्यक्ष जीवनराम श्रेष्ठ, जिल्ला समन्वय समिति प्रमुख सन्तोष बुढाथोकी, तारकेश्वर नगरपालिका उपप्रमुख सिर्जना बुर्लाकोटी, महिला खेल विज्ञ सुलोचना सिजाख्वा तथा खेलकुद पत्रकार मञ्च अध्यक्ष निरञ्जन अधिकारीले नेपालमा महिला खेलकुदको विकास, नीति सुधार, प्रशिक्षण अवसर र खेल पूर्वाधार विस्तारका विषयमा आफ्ना धारणा राखे।
नेपाल ओलम्पिक कमिटीका अध्यक्ष जीवनराम श्रेष्ठले खेलकुद नीतिमा समयानुकूल सुधार गर्दै महिला खेलाडीलाई थप अवसर उपलब्ध गराउनुपर्नेमा जोड दिए।
त्यसै गरी जिल्ला समन्वय समिति प्रमुख सन्तोष बुढाथोकीले स्थानीय तहबाटै खेलाडीलाई अवसर र प्लेटफर्म उपलब्ध गराउनुपर्नेमा जोड दिँदै स्थानीय , प्रदेश तथा संघ सरकार राष्ट्रिय खेलकुद परिषद् र ओलम्पिक कमिटीबीच समन्वय आवश्यक रहेको बताए।
कार्यक्रममा फाउण्डेसनका कार्यकारी निर्देशक सञ्जय अधिकारीले नेपालमा महिला खेलकुदलाई अझ व्यवस्थित र अवसरमूलक बनाउने लक्ष्यका साथ फाउण्डेसनले विभिन्न कार्यक्रम सञ्चालन गरिरहेको बताए।
कार्यक्रमकै क्रममा फाउण्डेसनले आगामी जेठ महिनामा छायानाथ अल्ट्रा म्याराथन आयोजना गर्ने घोषणा समेत गरेको छ।
