गौरमा दुई घण्टाका लागि कर्फ्यु खुकुलो, ८ :३० बाट निरन्तर लाग्ने [यस्तो छ तालिका]

काठमाडौँ- रौतहटको गौर नगरपालिकामा दुई समुदायबीच झडपका कारण लगाइएको कर्फ्यु आज (आइतबार) केही समयका लागि खुकुलो बनाइएको छ। जिल्ला प्रशासन कार्यालयका अनुसार घरका अत्यावश्यक सामान किनमेलका लागि अहिले बिहान ६:३० बजेदेखि ८:३० बजेसम्म कर्फ्यु खुकुलो बनाएको हो।

यसपछि बिहान साढे ८ बजेदेखि भने कर्फ्यु अर्को आदेश नभएसम्मका लागि निरन्तर रहनेछ। गौर नगरपालिकाको पूर्वमा मुडबलवा गेट, पश्चिममा लालवकैया बाँध, उत्तरमा बम नहर र दक्षिणमा गौर भन्सार कार्यालयको चार किल्लामा कर्फ्यु लगाइएको हो। यो क्षेत्रमा कुनै पनि व्यक्तिलाई आवतजावत गर्न, भेला, सभा, जुलुस तथ प्रदर्शन गर्न रोक लगाइएको छ।

स्थानीय समुदायबीच विवाद उत्पन्न भएपछि शनिबार दिउँसे १ बजेदेखि कर्फ्यु लगाइएको थियो। स्थिति नियन्त्रणमा आएको भए पनि थप हिंसाका घटना हुन नदिने कर्फ्यु जारी गरिएको जिल्ला प्रशासन कार्यालयले जनाएको छ।

कर्फ्युको आदेश उल्लंघन गर्नेलाई कारबाही गरिने स्थानीय प्रशासनले चेतावनी दिएको छ। शान्ति स्थापना गर्नका लागि सहयोग गर्न स्थानीय बासिन्दालाई आग्रह गरेको छ।