हिमाल प्रेस 
काठमाडौँ- राष्ट्रिय स्वतन्त्र पार्टी (रास्वपा)का सभापति रवि लामिछानेले निर्वाचनलाई असर पार्ने कुनै पनि काम नगर्न प्रमुख दललाई चेतावनी दिएका छन्।
सोमबार काठमाडौँमा नागरिक उन्मुक्ति पार्टीका नेताहरूलगायत थरुहट/थारुवान अभियन्ताहरूलाई रास्वपामा प्रवेश गराउँदै लामिछानेले मुलुकले धेरै कठिनाइ भोगिसकेकाले निर्वाचनमार्फत् सहज निकास दिनुपर्ने भन्दै निर्वाचनलाई असर पार्ने कुनै पनि काम नगर्न प्रमुख दललाई चेतावनी दिएका हुन्।
उनले केही दलहरू जेनजी आन्दोलनपछिको परिवर्तनलाई स्वीकार गर्न नचाहेको उल्लेख गर्दै आफ्नो असक्षमतालाई स्वीकार गर्न सुझाव दिए।
लामिछानेले नयाँ पुस्ताहरू देशलाई नयाँ उचाइमा पुर्याउन सक्षम रहेको र पुराना नेताले आफ्नो बारेमा धेरै चिन्ता नगर्न आग्रह गरे। आफ्नो दलका नेता राजनीतिक रुपमा परिपक्व हुँदै गएको भन्दै गिरेको मनोबल र अर्थतन्त्रलाई उकासेर छाड्ने स्पष्ट पारे। उनले पार्टीमा आएका नेताहरूलाई उचित जिम्मेवारी दिने प्रतिबद्धता जनाए।
कार्यक्रममा रास्वपा, नाउपाका नेता र थरुहट/थारुवान अभियन्ताबीच ९ बुँदे सहमति गरिएको थियो।
