हिमाल प्रेस 
नेपाली कांग्रेसको केन्द्रीय केन्द्रीय कार्यसमितिको बैठक। फाइल तस्बिर
काठमाडौँ- नेपाली कांग्रेस केन्द्रीय कार्यसमिति बैठक पार्टीको १५औँ महाधिवेशन नियमित गर्ने वा विशेष महाधिवेशन गर्ने भन्नेमा केन्द्रित भएको छ।
मंगलबार पार्टी कार्यालय सानेपामा बसेको बैठकमा पेचिलो बन्दै गएको १५औँ महाधिवेशनको कार्यतालिकाको सन्दर्भमा सदस्यहरूको फरकफरक धारणा आएको हो।
महाधिवेशनका विषयमा एकमत हुन नसक्दा केन्द्रीय कार्यसमिति बैठक लम्बिएको छ। मंगलबार बसेको बैठकपछि कांग्रेस नेता राजेन्द्रकुमार केसीले महाधिवेशनका साथै पछिल्लो राजनीतिक घटनाका क्रममा विषयमा सदस्यहरूले धारणा राखेको बताए। मंसिरमा अवधि सकिने भएकाले त्यसअघि नै नियमितरूपमा महाधिवेशन गर्नुपर्ने अधिकांशको धारणा रहेको उनले बताए। उनले चुनावमा पार्टीले भाग लिने निर्णय गरेको अवस्थामा त्यसअघि नै नेतृत्व चयन गर्नुपर्ने आफ्नो मत रहेको धारणा राखे।
असोज २८ गतेदेखि सुरु भएको बैठकमा पार्टीको १५ औँ महाधिवेशन सम्बन्धी विषयमा निरन्तर छलफल भइरहेको छ। मंगलबार सहमहामन्त्रीद्वय— बद्रीप्रसाद पाण्डे र जीवन परियार, केन्द्रीय सदस्यहरू ज्ञानेन्द्रबहादुर कार्की, डा. मिनेन्द्र रिजाल, दिपक गिरी, अम्बिका बस्नेत, मीनबहादुर विश्वकर्मा, सीता गुरुङ, रामजनम चौधरी, राजीवबिक्रम शाह, प्रकाश रसाइली स्नेही, भीम पराजुली र गोमाकुमारी भट्टराईले आ–आफ्नो धारणा राखेका थिए। बैठक बुधबार बिहान साढे ११ बजे पुन: बस्ने कांग्रेसले जनाएको छ।
