हिमाल प्रेस 
तस्बिर : क्यान
काठमाडौँ– अन्तर्राष्ट्रिय महिला टी –२० शृंखलाको आफ्नो दोस्रो खेलमा नेपाल विजयी भएको छ।
मलेसियाको क्वालालम्पुरस्थित बायुमास मैदानमा शनिबार भएको खेलमा नेपालले घरेलु टोली मलेसियालाई ६ विकेटले पराजित गर्दै जित हासिल गरेको हो।
यससँगै यो शृंखलामा नेपालले पहिलो जित दर्ता गराएको छ। यसअघि नेपाल मलेसियासँग पहिलो खेलमा तीन रनले पराजित भएको थियो।
शनिबार मलेसियाले जितका लागि दिएको ९२ रनको लक्ष्य पच्छ्याएको नेपाल १६ दशमलव दुई ओभरमा चार विकेट गुमाउँदै पूरा गर्यो। नेपालका लागि पूजा महतोले सर्वाधिक ३९ रन बनाइन्। त्यस्तै कप्तान इन्दु बर्मा २७ रनमा अविजित रहिन् भने रुबी पोद्दारले १५ रन बनाइन्। मलेसियाकी आयना हमिजाले दुई विकेट लिइन् भने नुर दानिया स्युहादा र नुर आलियाले समान एक÷एक विकेट लिए।
त्यसअघि ‘टस’ हारेर पहिले ‘ब्याटिङ’को निम्तो पाएको मलेसियाले निर्धारित २० ओभरमा चार विकेट गुमाएर ९१ रनको योगफल बनाएको थियो। मलेसियाका लागि आइना हमिजाले सर्वाधिक ५० रन योगदान दिएकी थिइन्। त्यस्तै कप्तान विनिफ्रेड दुरासिंघमले १५ रन बनाइन्।
नेपालकी सोमु विष्टले दुई तथा तथा कविता कुँवरले एक विकेट लिए। योसँगै नेपाल र मलेसियाबीचको पाँच खेलको शृंखला १–१ को बराबरीमा छ। नेपालले आगामी जनवरीमा घरेलु मैदानमा नै हुने आईसीसी महिला टी –२० विश्वकप ग्लोबल छनोटको तयारीस्वरुप उक्त शृंखला खेलेको हो।
