हिमाल प्रेस 
आक्रमणमा इरानको अर्धसैनिक संगठन रिभोल्युसनरी गार्ड्सका कमान्डर मारिएका छन्। तस्बिर साभार : डीडब्ल्यू
काठमाडौँ– इजरायलले इरानको राजधानी तेहरानमा शुक्रबार सबेरै आक्रमण गरेको छ। आक्रमणका कारण सहरभर विस्फोटको खबर आएका छन्। इजरायली अधिकारीहरूका अनुसार इरानका प्रमुख आणविक तथा सैन्य स्थलहरूलाई लक्षित गरी आक्रमण गरिएको हो। यो आक्रमण इरानको आणविक कार्यक्रमलाई लिएर बढ्दो तनावपछि भएको हो।
इजरायली डिफेन्स फोर्सेस (आईडीएफ) ले एक्समा एक भिडियो वक्तव्य जारी गर्दै भनेको छ, ‘वर्षौँदेखि इरानी शासनले इजरायली राज्यको विनाशको कुरा गर्दै आएको छ र त्यस्तो गर्नका लागि ठोस सैन्य योजना तयार गर्दै अगाडि बढाउँदै आएको छ।’
इजरायली प्रधानमन्त्री बेन्जामिन नेतन्याहुले यस अपरेसनलाई ‘राइजिङ लायन’ नाम दिएका छन्। उनले इरानबाट इजरायलको अस्तित्वमाथि खतरा नहटेसम्म अपरेसन जारी रहने बताएका छन्।
विभिन्न सञ्चारमाध्यमहरूको रिपोर्टअनुसार आक्रमणमा इरानको अर्धसैनिक संगठन रिभोल्युसनरी गार्ड्सका कमान्डर मारिएका छन्। इरानी सरकारी टेलिभिजनले होसेन सलामी मारिएको आशंका गरिएको जनाएको छ। इरानका सर्वोच्च नेता आयातुल्लाह अली खामेनेईले अब इजरायलले ‘कडा सजाय’ भोग्नुपर्ने चेतावनी दिएका छन्।
उनले वक्तव्यमा भनेका छन्, ‘यस अपराधसँगै यहुदी शासनले आफ्ना लागि तितो र पीडादायक नियति तय गरेको छ। त्यो उसले अवश्य भोग्नेछ।’
यो आक्रमणपछि तेहरानको मुख्य अन्तर्राष्ट्रिय विमानस्थलमा उडान स्थगित गरिएको छ भने छिमेकी इराकले पनि आफ्नो आकाशमार्ग पूर्ण रूपमा बन्द गरेको छ। अन्तर्राष्ट्रिय परमाणु ऊर्जा एजेन्सीले बुधबार मात्रै यो इरानले लगभग दुई दशकमा पहिलो पटक आफ्नो परमाणु अप्रसारसम्बन्धी दायित्वको उल्लंघन गरिरहेको जनाएको थियो।
अमेरिकाले आक्रमणमा आफू संलग्न नरहेको स्पष्ट पारेको छ। पछिल्ला दिनमा अमेरिकाले इराकको राजधानीबाट केही कूटनीतिज्ञहरू फिर्ता बोलाएको छ र मध्यपूर्वका अन्य क्षेत्रमा रहेका अमेरिकी सैनिकका परिवारहरूका लागि स्वेच्छिक अवकाशको मौका पनि दिएको छ। यो घटनापछि मध्यपूर्वमा थप अस्थिरताको सम्भावना देखिएको छ।
