हिमाल प्रेस 
बागलुङ- जिल्लाकै उत्कृष्ट किसान परिचित बागलुङ नगरपालिका-९ तित्याङका पदम खत्रीले एकै सिजनमा ६ लाखको काउली बिक्री गरेका छन्। २०६६ सालदेखि निरन्तर तरकारी खेतीमा लागेका उनी अहिले बागलुङका सफल किसान परिचित छन्।
उनले निजी, भाडा र बाँझो जग्गा गरी १८ रोपनी खेतबारीमा प्लास्टिक टनेल र टनेलबाहिर सिजन अनुसारका तरकारी उत्पादन गर्दै आएका छन्। पदम खत्रीले एग्रो फार्ममा मौसमी र बेमौसमी टमाटर, काउली, बन्दा, साग, सिमी र घिरौँलालगायत तरकारी फलाउँदै आएका छन्।
उनले गतवर्ष एउटै काउली ९ किलोको र यस वर्ष १२ किलो सम्मको फलाएका थिए। उनी कृषि ज्ञान केन्द्रबाट पटकपटक उत्कृष्ट किसान सम्मानित हुँदै आएका थिए। ‘निरन्तर मेहनत गरे सफलता पाइँदोरहेछ,अहिलेको सिजनमा मात्रै ६ लाखको काउली बजार पठाएँ, वर्षमा पाँच–६ लाखको त टमाटर नै बिक्री हुन्छ,’ खत्रीले भने,’आठवटा प्लास्टिक टनेल र खन्य खुल्ला रुपमा तरकारी उत्पादन हुँदै आएको छ, यस वर्ष काउलीको मूल्य राम्रो भएकाले धेरै नाफा भयो।’
स्वदेशमा केही गर्न सकिन्छ भन्ने सोचका साथ कृषि कर्ममा लागेका खत्रीले वार्षिक १२ देखि १४ लाख आम्दानी गर्दै आएका छन्। ‘अहिले काउली र ब्रोकाउली मात्रै १० क्विन्टल बिक्री गरेको थिएँ, ६ लाख आम्दानी त एक सिजको काउलीबाटै भयो,अहिले काउलीको बजार मूल्य १०० सम्म परेकाले राम्रो आम्दानी भयो,’ उनले भने। तरकारीखेती फस्टाउँदै गएपछि भाडामा आठ रोपनी जग्गा लिएर १८ रोपनी जग्गा पुर्याएका छन्।
