![आन्तरिक ऋणको आकार बढाइनु चिन्ताजनक : सांसद निशा डाँगी](https://himalpress.com/wp-content/uploads/2023/04/nisha.jpg)
काठमाडौँ- राष्ट्रिय स्वतन्त्र पार्टी (रास्वपा)की सचेतक निशा डाँगीले आन्तरिक ऋणको आकार बढाइनु चिन्ताजनक भएको बताएकी छन्। आज सोमबार आउँदो आर्थिक वर्षको बजेटमाथिको छलफलमा कमजोरी औंल्याउँदै उनले आन्तरिक ऋणको आकार बढाउनु गलत भएको बताएकी हुन्। ‘आन्तरिक ऋणको आकार जसरी बढाइएको छ। त्यो चिन्ताजनक छ,’ उनले भनिन्।
तीन खर्ब ३० अर्ब यति ठूलो परिणाममा सरकारले आन्तरिक ऋण लिँदा निजी क्षेत्रले लगानी गर्न पाउने रकममा संकुचन आउने टिप्पणी अर्थशास्त्रीहरूले गरेको उनले सुनाइन्। शिक्षा मन्त्रालयमा सबैभन्दा बढी बजेट पर्नु स्वागतयोग्य भएको बताइन्। उनले स्वास्थ्य क्षेत्रमा बजेट घटेर आएको पनि चिन्ताजनक भएको बताइन्।
बजेटमा हरेक पटक नयाँ नयाँ योजना थप्नु समस्या भएको उनको भनाइ छ। ‘यसपटक पनि केही राष्ट्रिय गौरवको आयोजना थपिएको छ। जस्तो कि खेलकुद रंगशाला बनाउनका लागि नयाँ राष्ट्रिय गौरवको आयोजना घोषणा गरिएको छ। यो सकारात्मक पक्ष हो,’ उनले भनिन्,’ तर, नामका लागि घोषणा गर्नुको कुनै औचित्य देखिँदैन।’