हिमाल प्रेस 
बच्चा चोरी गरेर जाँदै गरेकी मनकुमारी। सीसीटीभीमा कैद भएको तस्बिर
काठमाडौँ- गत शुक्रबार थापाथलीस्थित परोपकार प्रसूति गृह तथा स्त्रीरोग अस्पतालबाट २६ दिनकी नाबालिका चोरिएको प्रकरणमा पक्राउ परेका दुईजना रिहा भएका छन्।
जिल्ला प्रहरी परिसर काठमाडौँले बूढानीलकण्ठकी २२ वर्षीया सबिना श्रेष्ठकी २६ दिनकी नाबालिका चोरी प्रकरणमा पक्राउ परेका २८ वर्षीय नरेन्द्र मल्ल र उनकी दिदी शारदा शाही रिहा भएका हुन्।
चोरीमा उनीहरूको संलग्नता नदेखिएपछि प्रहरीले म्याद थपका लागि मनकुमारीलाई मात्रै अदालतमा लगेको छ। दुवैजनाले प्रारम्भिक सोधपुछका क्रममा उक्त घटनाबारे आफूहरूलाई थाहा नभएको बताएका थिए। मनकुमारीले पनि आफैँले मात्रै योजना बनाएर चोरी गरेको बयान दिएपछि उनीहरूलाई छाडिएको प्रहरीले जनाएकोछ।
रिहा भएका मल्ल नाबालिका चोरीमा संलग्न भनिएकी दैलेख नौमुले गाउँपालिका–१ १ घर भई काँडाघारी बस्ने २४ वर्षीया मनकुमारी सिंहका श्रीमान् हुन्। उनी नेपाली सेनामा कार्यरत छन्। उता शारदा मनकुमारीकी दिदी हुन्।
उनीहरूलाई काभ्रेपलाञ्चोक चौरीदेउराली गाउँपालिका वडा नम्बर ३ स्थायी घर भई हाल कपनमा बस्ने सबिनाकी नाबालिकालाई चोरी अभियोगमा पक्राउ गरिएको थियो।जन्डिसको लक्षण देखिएपछि उपचारका लागि ल्याइएकी नाबालिका चोरी प्रकरणमा पक्राउ मनकुमारी भने प्रहरी हिरासतमै छिन्।
मनकुमारीलाई सीसीटीभी फुटेजमा देखिएको हुलियाका आधारमा खोज्दै जाँदा प्रहरीले काठमाडौँकै काँडाघारीस्थित डेराबाट शुक्रबार मध्यराति पक्राउ गरेको थियो।पक्राउ परेका सैनिक दम्पतीको विवाह भएको ३ वर्ष भइसक्दा पनि सन्तान भएको थिएन। सन्तान नभएपछि उनको बच्चा चोरेको प्रारम्भिक बयानमा बताएकी छन्।
जिल्ला प्रहरी परिसर काठमाडौँले नाबालिकालाई अभिभावकको जिम्मा लगाइसकेको छ। उनको सिनामंगलस्थित काठमाडौँ मेडिकल कलेजमा उपचार भइरहेको छ।
