हिमाल प्रेस 
फाइल तस्बिर
काठमाडौँ- एसीसी वुमन्स प्रिमियर कपमा आज नेपालले माल्दिभ्ससँग खेल्दैछ।
यो खेल नेपाली समय अनुसार बिहान ११ : १५ बजेदेखि मलेसियाको वाईएसडी ओभलमा हुनेछ।
नेपालले यस अघि लगातार दुई खेलमा जित हासिल गरेर प्रतियोगिताको क्वाटरफाइनलमा आफ्नो स्थान सुरक्षित गरिसकेको छ भने माल्दिभ्सले यस अघिका दुवै खेलमा हार बेहोरेर प्रतियोगिताबाट बाहिरिएको छ।
नेपालले यसअघि हङकङ र भुटानमाथि ८९८ विकेटको जित हासिल गरेको थियो। त्यस्तै माल्दिभ्स भने भुटानसँग ९४ रनले तथा हङकङसँग १७२ रनले हार बेहोरेको थियो।
आजै समूह डी कै भुटान र हङकङले पनि समूह चरणको अन्तिम खेल खेल्दैछन्।
यो खेल पछि क्वाटरफाइनलको समीकरण तय हुने छ।
नेपाल रहेको समूह ‘डी’मा हङकङ, माल्दिभ्स र भुटान छन्।
एसियाली क्रिकेट काउन्सील (एसीसी)ले वुमन्स प्रिमियर कप पहिलो पटक आयोजना गरेको हो। यो प्रतियोगिताको फाइनलमा पुग्ने दुई टोलीले आगामी जुलाईमा आयोजना हुने वुमन्स टी-२० एसिया कपमा सहभागिता जनाउन पाउनेछ।
एसिया कपमा भारत, पाकिस्तान, बंगलादेश, श्रीलंका र छनोट चरणबाट आउने दुई टोली सहभागी हुनेछन्।
फेब्रुअरी १८ तारिखसम्म सञ्चालन हुने वुमन्स प्रिमियर कपमा कुल १६ वटा राष्ट्रको सहभागिता रहेको छ।
प्रतियोगिताको समूह ‘सी’ मा बहराइन, इन्डोनेसिया, आयोजक मलेसिया र कतार रहेका छन्। समूह ‘बी’ मा चीन, जापान, ओमान र संयुक्त अरब इमिरेट्स (यूएई) परेका छन्।
समूह ‘ए’ मा भने कुवेत, म्यानमार, सिंगापुर र थाइल्यान्ड रहेका छन्।
समूहगत चरणको खेलपछि प्रत्येक समूहबाट दुईदुई टोली प्रतियोगिताको क्वार्टरफाइनलमा प्रवेश गर्नेछन्। चारवटै क्वार्टरफाइनल खेल फेब्रुअरी १४ तारिखमा खेलिनेछ।
सेमिफाइनल खेल फेब्रुअरी १६ र फाइनल खेल १८ तारिखमा हुनेछ।
