तनहुँमा घाइते अजिंगर फेला

दमौली- तनहुँको व्यास नगरपालिका–१४ स्थित रुम्सीमा आज (मंगलबार) अजिंगर फेला परेको छ। स्थानीयवासीले करिब चार मिटर लम्बाइ भएको अजिंगर फेला पारेका हुन्।

स्थानीयले उक्त अजिंगर डिभिजन वन कार्यालय तनहुँमा बुझाएका छन्। डिभिजन वन कार्यालय तनहुँका सहायक वन अधिकृत काशीराज पण्डितले अजिंगरलाई वन कार्यालयमा सुरक्षित रूपमा राखिएको जानकारी दिए।

घाइते अवस्थामा रहेको अजिंगरलाई केही दिनमा सुरक्षित स्थानमा छाडिने उनले बताए।