कोशीका नवनियुक्त मुख्यमन्त्रीको शपथ आइतबार

इटहरी– कोशी प्रदेशका नवनियुक्त मुख्यमन्त्री केदार कार्कीको शपथग्रहण आइतबार दिउँसो १ बजे हुने भएको छ। कार्कीलाई प्रदेश प्रमुख परशुराम खापुङले शनिबार मुख्यमन्त्रीमा नियुक्त गरेका हुन्।

एमालेका ३९ र कांग्रेसका ९ सांसदले समर्थनमा कार्की संविधानको धारा १६८ को उपधारा ५ अनुसार मुख्यमन्त्रीमा नियुक्त भएका छन्। ४८ सांसदले मुख्यमन्त्री बनाउन दिएको निवेदनमा हस्ताक्षर सनाखत गरेपछि प्रदेश प्रमुख खापुङले कार्कीलाई मुख्यमन्त्री नियुक्त गरेका हुन्।

मुख्यमन्त्रीका लागि गठबन्धनको तर्फबाट माओवादी संसदीय दलका नेता इन्द्रबहादुर आङ्बोले पनि दाबी पेस गरेका थिए। गत असोज २० गते मुख्यमन्त्री हिक्मतकुमार कार्कीले विश्वासको मत नपुग्ने भएपछि पदबाट राजीनामा दिएका थिए। सोही कारण प्रदेशमा नयाँ मुख्यमन्त्री चयनको प्रक्रिया अगाडि बढेको थियो।