बजारसम्म तरकारी पुर्‍याउन पोखरा महानगरले ल्यायो कृषि एम्बुलेन्स

हिमाल प्रेस १४ साउन २०८० ९:१४
48
SHARES
बजारसम्म तरकारी पुर्‍याउन पोखरा महानगरले ल्यायो कृषि एम्बुलेन्स

पोखरा– पोखरा-१६ अर्मला निवासी वर्षा गुरुङले आफ्नो बारीमा गोलभेँडा र तरकारी खेती उत्पादन गर्छिन्, तर उत्पादित तरकारी किन्नकै लागि भनेर अर्मलासम्म व्यापारी पुग्दैनन्।

उत्पादित तरकारी बिक्री गर्न उनलाई १० किलोमिटर टाढा पोखरा-९ स्थित शान्तिवनको तरकारी तथा फलफूल बजारमा पुग्नुपर्थ्यो भने उत्पादित तरकारीले उचित मूल्यसमेत पाउन मुस्किल थियो।

तर अहिले आफ्नै वडाको ठूलीपोखरीमा किसान बजारस्थल खुलेपछि उत्पादित तरकारी बिक्री गर्न गुरुङलाई शान्तिवन धाउनुपर्ने अवस्था हटेको छ।

पोखरा-१९ पुरनचौरका किसान तुल्सी बाँस्तोलाको पीडा पनि गुरुङको जस्तै छ। आफ्नो बारीमा उत्पादन गरेको घिरौला, काक्रा, लौका, सिमी, बोडी र गोलभेँडा बिक्रीका लागि उनी पनि २० किलोमिटरको दूरी पार गर्दै पोखरा-९ को शान्तिवनस्थित तरकारी बजारमा पुग्नुपर्ने अवस्था थियो।

तर शनिबारदेखि यस क्षेत्रका किसानले उत्पादन गरेको कृषि उपज आफ्नै वडामा किन्ने व्यवस्था पोखरा महानगरपालिकाले गरिदिएको छ।

पोखरा महानगरपालिका वडा १९ र १६ को संगमस्थल ठूलीपोखरीमा किसान बजार सञ्चालनमा आएपछि किसानले उत्पादन गरेको कृषिजन्य वस्तुले बजार पाएको छ।

पोखरा महानगरपालिकाले १ महिनायता कृषि एम्बुलेन्स सञ्चालन गरी वडाको दुर्गम क्षेत्रमा उत्पादित तरकारी बजार क्षेत्रमा ल्याएर बिक्री गर्ने व्यवस्था मिलाइदिएपछि किसानको अनुहारमा खुसी छाएको छ।

पोखरा महानगरपालिका वडा १९ र १६ को संगमस्थल ठूलीपोखरीमा सञ्चालनमा ल्याइएको किसान बजारस्थलमा शनिबार तरकारी किन्न स्थानीयको भीड नै लागेको थियो।

‘किसान बजारसँगै हामी स्थानीय उपभोक्ताले ताजा र सस्तो मूल्यमा तरकारी उपभोग गर्न पाएका छौं। बिचौलिया हाबी नहुँदा किसानले समेत उचित मूल्य पाएका छन्,’ तरकारी किन्दै गरेकी पोखरा-१६ निवासी बेनी बस्नेतले भनिन्।

स्थानीय उपपभोक्ताले बजारले नियमितता पाउनुपर्ने माग राखेका छन्। भारतबाट ल्याइएको बासी र विषादीयुक्त तरकारी उपभोग गर्नुपर्ने बाध्यता हटेको छ, स्थानीय दुर्गादेवी अधिकारीले बताइन्।

वडास्तरीय उक्त किसान बजारस्थलको संयोजक जीत बस्नेत रहेका छन्।

बजारलाई नियमितता दिने प्रयास आफ्नो रहने र फलफूलका साथै पछिल्ला दिनमा दूध र मासुको समेत व्यवस्था गरिने उनले बताए।

महानगरपालिकाको कृषि एम्बुलेन्सले ल्याएको तरकारी बजारस्थलमा १०-२० प्रतिशत नाफा लिएर उपभोक्तलाई बिक्री गरिएको उनले जानकारी दिए।

कृषि एम्बुलेन्सले ल्याउन नसकेका दिन पनि बजारकै तर्फबाट ढुवानी गरेर तरकारी बजारस्थलमा ल्याइने उनले बताए।

पोखरा महानगरपालिका-१९ का वडाध्यक्ष पुष्पेन्द्र पाण्डे, वडा १६ का अध्यक्ष अमृत तिमिल्सेना र पोखरा महानगरपालिका कृषि तथा पशु सेवा महाशाखाका प्रमुख मनोहर कडरियाले ठूलीपोखरीमा शनिबारदेखि सञ्चालनमा आएको किसान बजारस्थलको संयुक्त रूपमा उद्घाटन गरेका थिए।

सो अवसरमा बोल्दै वडा १९ का वडाध्यक्ष पाण्डेले किसानले उत्पादन गरेको तरकारीको बजारीकरण गरी उनीहरूलाई कृषिप्रति आकर्षित गर्नुपर्नेमा जोड दिए। युवाको विदेशमोहलाई घटाउनका लागि पनि सरकारी तहबाट कृषि क्षेत्रलाई अनुदान दिएर भए पनि कृषिप्रति युवाको आकर्षण बढाउन जरुरी रहेको उनको भनाइ छ।

पोखरा-१६ का वडाध्यक्ष तिमिल्सेनाले किसान बजारलाई निरन्तरता दिने कार्यमा आफ्नो प्रयास रहने बताउँदै नजिकै बजार स्थापना भएपछि स्थानीय किसानले समेत आफ्नो उत्पादनलाई वृद्धि गर्ने उनले विश्वास व्यक्त गरे।

किसानलाई प्रोत्साहन र कृषि क्षेत्रको प्रवर्द्धन गर्न वडास्तरबाट समेत बीउबिजन र सहज रूपमा रासायनिक मल उपलब्ध गराउने व्यवस्था मिलाउन आफ्नो प्रयास रहने उनले बताए। कृषि क्षेत्रको प्रवर्द्धन गर्न र पोखरेली उपभोक्तालाई ताजा र कम विषदीयुक्त तरकारी खुवाउन आफ्नो प्रयास रहेको उनको भनाइ छ।

कृषि एम्बुलेन्सले पोखराका विभिन्न वडामा पुगेर किसानले उत्पादन गरेको तरकारी विभिन्न बजारस्थलसम्म ल्याउने गरेको उनले बताए।

महानगरले पोखराका विभिन्न १५ स्थानमा संकलन केन्द्र र ५ स्थानमा किसान बजारस्थल सञ्चालनमा ल्याएको महानगरका कृषि तथा पशु सेवा महाशाखाले जनाएको छ।


प्रतिक्रिया

Leave a Reply

Your email address will not be published. Required fields are marked *

fifteen − eight =