हिमाल प्रेस 
काठमाडौँ- नेपाली भाषा र साहित्यमा लामो समयदेखि साधना गरी अतुलनीय योगदान पुर्याएबापत प्राध्यापकद्वय डा. दयाराम श्रेष्ठ र डा. राजेन्द्र विमललाई रथारोहण गरी सम्मान गरिएको छ।
२१० औँ भानु जयन्तीका अवसरमा भानु प्रतिष्ठान र नेपाल प्रज्ञा प्रतिष्ठानद्वारा आज (शुक्रबार) यहाँ आयोजित समारोहमा उनीहरूलाई रथारोहण गरी नगर परिक्रमा गरिएको हो।
डा. श्रेष्ठ नेपाली कथा लेखनको समालोचनामा र डा. विमल कथा लेखन र नेपाली राष्ट्रियता प्रवर्द्धनमा ख्यातिप्राप्त हुन्।
प्रत्येक वर्ष भानु जयन्तीका अवसरमा नेपाली भाषा र साहित्यका क्षेत्रमा विशिष्ट योगदान दिने ज्येष्ठ साहित्यकारलाई बग्गीमा राखेर नगर परिक्रमा गराउने चलन रही आएको छ।
यसअघि युगकवि सिद्धिचरण श्रेष्ठ, राष्ट्रकवि माधवप्रसाद घिमिरे र समालोचक डा. वासुदेव त्रिपाठीलगायतलाई रथारोहण गराइएको थियो।
प्रकाशित: २९ असार २०८० २०:२८
प्रतिक्रिया
