संस्कृत विश्‍वविद्यालयमा १२ वर्षपछि दीक्षान्त समारोह हुँदै, प्रचण्ड सहभागी हुने

हिमाल प्रेस २७ जेठ २०८० ७:२९
10
SHARES
संस्कृत विश्‍वविद्यालयमा १२ वर्षपछि दीक्षान्त समारोह हुँदै, प्रचण्ड सहभागी हुने

दाङ– नेपाल संस्कृत विश्वविद्यालयको दीक्षान्त समारोह १२ वर्षपछि हुन लागेको छ। ०६८ सालमा विश्वविद्यालयको समारोह भएको थियो। यसपछि दीक्षान्त समारोह हुन सकेको थिएन। प्रत्येक वर्ष हुनुपर्ने दीक्षान्त समारोह हुन नसकेको हो।

यसपटक प्रधानमन्त्री एवम् कुलपति पुष्पकमल दाहाल ‘प्रचण्ड’ ले अनुमति दिएपछि दीक्षान्त समारोह हुन लागेको विश्वविद्यालयका शिक्षाध्यक्ष भीम खतिवडाको भनाइ छ। ‘विश्वविद्यालयको दीक्षान्त समारोह प्रत्येक वर्ष हुनुपर्ने हो,’ उनले भने, ‘तर, कुलपतिले अनुमति नदिँदा लामो समयदेखि दीक्षान्त समारोह हुन सकेका थिएन, यस पटक कुलपतिले अनुमति दिएपछि समारोह गर्न लागेका छौं।’

विश्वविद्यालयको केन्द्रीय कार्यालय बेलझुण्डीमै उक्त समारोह हुन लागेको हो। यो पाँचौं दीक्षान्त समारोह रहेको उनको भनाइ छ। यसअघि ०६८ मा पनि १० वर्षपछि मात्रै दीक्षान्त समारोह भएको हो। ०५७ पछि ०६८ मा मात्रै दीक्षान्त समारोह भएको थियो।

यसपटक ३१ जेठमा दीक्षान्त समारोह हुन लागेको र सोही कार्यक्रममा प्रधानमन्त्री एवम् कुलपति प्रचण्ड सहभागी हुने कार्यक्रम छ। दीक्षान्त समारोहमा नहुँदा ग्रयाजुएट विद्यार्थीले मूल प्रमाण पत्र पाउन सकेका छैनन्।

०७७ सालसम्म १० वटा शैक्षिक शत्रमा विश्वविद्यालयबाट विद्यावारिधी, आचार्य, शास्त्री, एक वर्षे शिक्षाशास्त्री र बीएएमएस उत्तीर्ण गरेका चार हजार सात सय ७३ विद्यार्थीलाई कुलपतिले मूल प्रमाण पत्र प्रदान गर्ने कार्यक्रम छ।

यसमा पनि विश्वविद्यालय टपरमध्ये स्वर्ण, रजत र कास्य पदक प्राप्त गर्नेलाई मञ्चमै बोलाइन्छ भने अन्य ग्रयाजुएटलाई फलोरमा राखिन्छ। यसपछि प्रधानमन्त्री तथा कुलपतिले दीक्षामन्त्र ग्रहणसमेत गराउनुहुन्छ भने प्रमाण पत्र पनि प्रदान गर्ने कार्यक्रम रहेको उपप्रशासक विनयकुमार पोखरेलको भनाइ छ।

प्रमाण पत्रले विश्वविद्यालयबाट दीक्षित भएको भनी अन्तर्राष्ट्रिय मान्यता पाउन सहज हुने उनको भनाइ छ।

यस वर्ष लामो समयपछि दीक्षान्त समारोह गरिएको भए पनि अब भने नियमित गर्ने गरी तयारी गरेको उपप्रशासक पोखरेलको भनाइ छ। ‘प्रत्येक वर्ष गर्नुपर्ने दीक्षान्त समारोह लामो समयपछि हुन लागेको छ,’ उनले भने, ‘यसपछि भने हामी नियमित प्रत्येक वर्ष समारोह गर्ने गरी प्रणालीको विकास गर्न लागेका छौं।’

विश्वविद्यालय अब सिस्टममा चल्ने भन्दै अब प्रत्येक वर्ष यो समारोह आयोजना गर्ने तयारी गरिएको उनको भनाइ छ। प्रधानमन्त्री तथा कुलपति आउने भएपछि तयारीलाई तीव्र पारिएको छ। विश्वविद्यालयको प्रांगणमा उक्त कार्यक्रम हुने भएकाले त्यहाँ सडक कालो पत्रे गर्न लागिएको उपप्रशासक पोखरेलको भनाइ छ।

यसका लागि लुम्बिनी प्रदेश आर्थिक मामिला मन्त्रालयबाट १० लाख बजेट आएको उनको भनाइ छ। त्यही बजेटबाट त्यहाँ कालो पत्रे गर्ने काम अघि बढेको छ। विश्वविद्यालयमा ७७ वटै जिल्लाका विद्यार्थी अध्ययन गरिरहेका छन्।


प्रतिक्रिया

Leave a Reply

Your email address will not be published. Required fields are marked *

2 × five =