प्रदेशको नामकरणलाई पहिलो प्राथमिकतामा राखेको छु : मुख्यमन्त्री कार्की

इटहरी– प्रदेश १ का मुख्यमन्त्री हिक्मतकुमार कार्कीले गुणस्तरीय शिक्षा प्रदानमा निजी क्षेत्रले महत्त्वपूर्ण भूमिका निर्वाह गरेको बताएका छन्। उच्च शिक्षालय तथा माध्यमिक विद्यालय संघ नेपाल मोरङ (हिसान)द्वारा आयोजित खेलकुद सप्ताह-२०७९ को समापन गर्दै उनले शिक्षा क्षेत्रमा सरकारले गर्नुपर्ने लगानी निजी क्षेत्रले विद्यालयहरू सञ्चालनका लागि गरेको उल्लेख गरे।

संघीयतालाई स्थापित गर्ने दायित्व हामी सबै काँधमा आएको बताउँदै उनले प्रदेश संरचनाको सम्बन्धमा उठेका विभिन्न क्षेत्र एवम् व्यक्ति गर्ने आलोचनालाई चिर्न सबैको साथ र सहयोग हुनुपर्नेमा जोड दिए।

मुख्यमन्त्री कार्कीले सरकारले प्रदेशको नामकरणलाई उच्च प्राथमिकतामा राखेको छ भन्दै यसका लागि आवश्यक सुझाव एवम् सल्लाह दिन आग्रह गरे।

यही माघ १० देखि १६ गतेसम्म स्थानीय शहीद रंगशालामा सञ्चालित खेलकुद सप्ताहमा जिल्लाका २८ वटा विद्यालयका १ हजार ७ सय विद्यार्थीहरूले फुटबल, भलिबल, क्रिकेट, बास्केटबल, टेबलटेनिस सिंगल र डबल, लामो र छोटो दूरीको दौडलगायत प्रतियोगितामा भाग लिएका थिए। सो अवसरमा मुख्यमन्त्री कार्कीले विभिन्न विद्यालयमा अध्ययनरत उत्कृष्ट छात्र, छात्रा र प्राचार्यलाई सम्मान गरेका छन्।