हिमाल प्रेस 
फाइल तस्बिर।
काठमाडौँ– अंग्रेजी वर्ष सन् २०२३ को जनवरी महिनामा ५५ हजार ७४ विदेशी पर्यटक नेपाल भित्रिएका छन्।
नेपाल पर्यटन बोर्डले उपलब्ध गराएको तथ्यांकअनुसार वर्षको पहिलो महिना हवाई मार्ग भएर ५५ हजार बढी विदेशी नागरिकले नेपाल भ्रमण गरेका हुन्। पर्यटक आगमन उत्साहवर्द्धक रहेको बोर्डका निर्देशक मणिराज लामिछानेले बताए। अफ सिजनमा पनि उल्लेख्य संख्यामा पर्यटक भित्रिनु सकारात्मक सुरुवात भएको उनले उल्लेख गरे।
जनवरीमा भारतबाट १६ हजार ४ यस ३६ पर्यटक आएका छन्। अमेरिकाबाट ६ हजार ५ सय ६१ पर्यटकले नेपाल भ्रमण गरेका छन्। यस्तै अष्ट्रेलियाबाट ३ हजार ४ सय ४१ र बंगलादेशबाट २ हजार ४ सय ६८ पर्यटक भित्रिएको बोर्डको विवरणमा उल्लेख छ।
सन् २०२२ को जनवरीमा १६ हजार ४ सय ३६ पर्यटक आएका थिए भने सन् २०२१ मा ८ हजार ६ सय ७४ पर्यटकले नेपाल भ्रमण गरेका थिए। यो विवरण हेर्दा महामारीपछि जनवरी महिनामा हालसम्मकै उल्लेख्य पर्यटक आएको देखिन्छ।
कोभिड-१९ महामारीका कारण घटेको विदेशी पर्यटकको संख्या सन् २०२२ मा भने केही बढेको थियो। उक्त वर्ष छ लाख १४ हजार एक सय ४८ विदेशी पर्यटकले नेपाल भ्रमण गरेका थिए।
महामारीपूर्व सन् २०१९ मा ११ लाख ९७ हजार ९१ पर्यटक नेपाल आएका थिए तर सन् २०२० मा कोभिड महामारीका कारण विदेशी पर्यटकको संख्या ८१ प्रतिशतले कमी आई २ लाख ३० हजार ८५ जना पर्यटक नेपाल भित्रिएका थिए।
यस्तै २०२१ मा भने १ लाख ५० हजार नौ सय ६२ पर्यटक नेपाल आएका थिए। जुन सन् २०२० को तुलनामा ३४ दशमलव ४ प्रतिशतले कमी हो। -रासस
