हिमाल प्रेस 
काठमाडौँ- चालु आर्थिक वर्षको पहिलो १० महिनामा जग्गा तथा घरजग्गा कारोबारबाट हुने राजस्व संकलन १५.२ प्रतिशतले वृद्धि भएको छ। भूमि व्यवस्थापन तथा अभिलेख विभागका अनुसार आर्थिक वर्ष २०८२/८३ को साउनदेखि वैशाख मसान्तसम्म जग्गा तथा घरजग्गा कारोबारबाट ४३ अर्ब ४८ करोड रुपैयाँ राजस्व संकलन भएको छ। अघिल्लो आर्थिक वर्षको सोही अवधिमा यस्तो राजस्व ३७ अर्ब ७४ करोड रुपैयाँ थियो।
वैशाखमा विभागले ६ अर्ब २६ करोड रुपैयाँ राजस्व संकलन गरेको छ, जुन चालु आर्थिक वर्षकै हालसम्मको सबैभन्दा उच्च मासिक संकलन हो। उक्त अवधिमा सबैभन्दा धेरै योगदान रजिस्ट्रेसन शुल्कबाट आएको छ। यस शीर्षकबाट तीन अर्ब ३१ करोड रुपैयाँ राजस्व उठेको विभागले जनाएको छ। यस्तै पुँजीगत लाभकरबाट दुई अर्ब ५५ करोड रुपैयाँ र सेवा शुल्कबाट २४ करोड ४० लाख ६ हजार रुपैयाँ संकलन भएको छ।
हालको कर व्यवस्थाअनुसार खरिद गरेको पाँच वर्षभित्र बिक्री गरिएको सम्पत्तिबाट प्राप्त लाभमा ७.५ प्रतिशत पुँजीगत लाभकर लाग्ने व्यवस्था छ। पाँच वर्ष वा सोभन्दा बढी समय स्वामित्वमा राखिएको सम्पत्तिको हकमा भने पाँच प्रतिशत कर लाग्ने प्रावधान छ।
भूमि प्रशासन कार्यालयहरूमध्ये भूमि प्रशासन कार्यालय डिल्लीबजारले चालु आर्थिक वर्षको पहिलो १० महिनामा सबैभन्दा धेरै ५९ करोड ९१ लाख २० हजार रुपैयाँ राजस्व संकलन गरेको छ। त्यसपछि भूमि प्रशासन कार्यालय लगनखेलले ५२ करोड ९६ लाख ७० हजार रुपैयाँ र भूमि प्रशासन कार्यालय भक्तपुरले ४७ करोड १४ लाख १० हजार रुपैयाँ राजस्व संकलन गरेका छन्।
भूमि प्रशासन कार्यालय सिर्दिबासले समीक्षा अवधिमा सबैभन्दा कम ६३ हजार ६१० रुपैयाँ मात्र राजस्व संकलन गरेको छ।
विभागले देशभर जग्गा तथा घरजग्गा कारोबारको संख्यामा पनि वृद्धि भएको जनाएको छ। वैशाख महिनामा ६४ वटा अपार्टमेन्ट एकाइसमेत समेटिएका कुल ५८ हजार ९५० कारोबार दर्ता भएका छन्। अघिल्लो आर्थिक वर्षको सोही महिनामा यस्तो कारोबार संख्या ५२ हजार ४१५ थियो।
सुनसरीस्थित भूमि प्रशासन कार्यालय इनरुवामा समीक्षा अवधिमा सबैभन्दा धेरै दुई हजार एक सय ५४ कारोबार दर्ता भएका छन्। त्यसपछि झापाको भूमि प्रशासन कार्यालय भद्रपुरमा दुई हजार ४३ र मोरङको भूमि प्रशासन कार्यालय बेलबारीमा एक हजार ८३६ कारोबार दर्ता भएका छन्।
