हिमाल प्रेस 
काठमाडौँ- आईसीसी-१९ वर्षमुनिको विश्व कप क्रिकेटअघिको अभ्यास खेलमा नेपालले आज स्कटल्यान्डसँग खेल्दैछ।
दक्षिण अफ्रिकामा रहेको नेपाली टोलीले पहिलो औपचारिक अभ्यास खेल खेल्न लागेको हो। नेपाल र स्कटल्यान्डबीचको अभ्यास खेल नेपाली समयअनुसार दिउँसो सवा १ बजे सुरु हुनेछ।
आज नामिबिया र अमेरिका, दक्षिण अफ्रिका र पाकिस्तान तथा अस्ट्रेलिया र भारतबीच पनि अभ्यास खेल हुनेछ। यसअघि नेपालले सोमवार स्कटल्यान्ड र बिहीवार नामिबियासँग खेलेको अनौपचारिक अभ्यास खेलमा स्कटल्यान्डलाई एक सय ३५ र नामिबियालाई ६ रनले हराएको थियो।
आईसीसीले विश्व कपअघि हरेक टोलीलाई दुईदुईवटा अभ्यास खेल खेल्ने व्यवस्था मिलाएको छ। नेपालले दोस्रो अभ्यास खेल मंगलबार वेस्ट इन्डिजसँग खेल्नेछ। १९ वर्षमुनिको विश्व कप आउँदो माघ ५ गतेदेखि सुरु हुनेछ।
यो विश्व कपमा नेपालसहित १६ वटा देश सहभागी छन्। नेपाल प्रतियोगिताको समूह ‘डी’ मा छ। नेपालको समूहमा अफगानिस्तान, न्युजिल्यान्ड र पाकिस्तान छन्।
