हिमाल प्रेस 
काठमाडौँ- पशुपति क्षेत्र विकास कोषले भदौ १० गतेको भोटेकोशी बाढीमा ज्यान गुमाएकाहरूका लागि पशुपति क्षेत्रमा गरिने दाहसंस्कार र किरियापुत्री सेवासम्बन्धी सम्पूर्ण शुल्क निःशुल्क गर्ने व्यवस्था गरेको छ।
कोषले सोमबार सूचना जारी गर्दै विपद्का कारण मृत्यु भएकाहरूको सम्मानजनक अन्त्येष्टि सुनिश्चित गर्न उक्त निर्णय गरिएको जनाएको हो। बाढीमा मृत्यु भएका व्यक्तिका परिवारलाई आर्थिक भार कम गर्दै धार्मिक तथा सामाजिक परम्पराअनुसार अन्त्येष्टि सम्पन्न गर्न सहजीकरण गर्ने उद्देश्यले सेवा निःशुल्क गरिएको कोषले जनाएको छ।
रसुवाको भोटेकोशी नदीमा आएको भीषण बाढीले रसुवा, नुवाकोट, धादिङ र गोरखाका नदी तटीय क्षेत्रमा ठूलो जनधनको क्षति पुर्याएको थियो। सरकारले खोज, उद्धार र राहत कार्यलाई तीव्र बनाइरहेको छ भने प्रभावित परिवारका लागि विभिन्न निकायले सहजीकरणका कार्यक्रम सञ्चालन गरिरहेका छन्।
कोषले आवश्यक समन्वय र थप जानकारीका लागि आफ्नो कार्यालयमा सम्पर्क गर्न समेत आग्रह गरेको छ।
