हिमाल प्रेस 
तस्बिर : एफपी
काठमाडौँ- इजरायली प्रधानमन्त्री बेन्जामिन नेतन्याहुले छिट्टै अमेरिका भ्रमण गर्ने कायक्रम रहेको इजरायली प्रधानमन्त्रीको कार्यालयले जानकारी गराएको छ।
प्रधानमन्त्रीको कार्यालयद्वारा जारी विज्ञप्तिअनुसार शुक्रबार भएको टेलिफोन संवादका क्रममा प्रधानमन्त्री नेतन्याहुले अमेरिका स्थापनाको २५० औँ बर्षगाँठको अवसरमा अमेरिकी जनता र राष्ट्रपति स्वयंलाई इजरायल र त्यहाँका नागरिकको तर्फबाट बधाइ दिएका थिए।
विज्ञप्तिमा प्रधानमन्त्री नेतन्याहुले अमेरिकाको स्थापना भएको २५० औँ वर्षगाँठको अवसरमा ट्रम्पलाई बधाई दिएका थिए।
उनले भनेका छन्, ‘संयुक्त राज्य अमेरिका नै विश्वको स्वतन्त्रता सुनिश्चित गर्ने भूमिकामा महत्वपूर्ण योगदान गर्न सक्छ, इजरायल दुई राष्ट्रबीचको घनिष्ठ सम्बन्धको अत्यधिक कदर गर्दछ।’
विज्ञप्तिमा अगाडि भनिएको छ, ‘प्रधानमन्त्री नेतन्याहु र राष्ट्रपति ट्रम्पले अमेरिकामा चाँडै भेट्ने सहमति भएको छ।’
टाइम्स अफ इजरायलका अनुसार प्रधानमन्त्रीको कार्यालयले प्रस्तावित भेटको कुनै विशिष्ट मिति वा स्थानको बारेमा जानकारी दिएको छैन।
अमेरिकी राष्ट्रपति ट्रम्पले पछिल्ला केही हप्ताहरूमा लेबनानमा हिजबुल्लाहसँगको युद्धले इरानसँगको शान्ति वार्तालाई जोखिममा पारेको नेतन्याहुको आलोचना गर्दै आएका समय दुई नेताबीच टेलिफोन संवाद भएको हो।
इरानसँग भएको १४ बुँदे समझदारी पत्रमा युद्धविरामका लागि वातावरण बनाउन ६० दिनको समयसीमा तोकिएको छ। कतार र पाकिस्तानले जुलाई १ मा दोहामा अमेरिका र इरानी वार्ताकारहरूसँग अलग–अलग बैठक सम्पन्न गरेका थिए। कतारको विदेश मन्त्रालयका प्रवक्ताका अनुसार, १४ बुँदे सम्झौतासम्बन्धी विषयहरूमा ‘सकारात्मक प्रगति’ भएको छ।
यसअघि जुलाई १ मा इजरायलले लेबनानसँगको विद्यमान युद्धविरामको ढाँचाका बावजुद हिजबुल्लाहविरुद्ध सैन्य कारबाही जारी राख्ने बताएको थियो। इजरायली उपविदेशमन्त्री शारेन हास्केलले भनेका थिए, ‘इरान समर्थित यो सशस्त्र समूहले अझै पनि प्रत्यक्ष सुरक्षा खतरा उत्पन्न गरिरहेको छ र लेबनानमा स्थायी स्थिरता हासिल गर्न हिजबुल्लाहलाई निःशस्त्र नगरी सम्भव छैन।’
यसैबीच, जुन ३० मा इजरायली प्रधानमन्त्री बेन्जामिन नेतन्याहुले अमेरिकी आर्थिक सहायता समाप्त गर्ने महत्वाकांक्षी नीति परिवर्तनको घोषणा गरेका थिए। उनले देशको अर्थतन्त्र मजबुत रहेकाले अब विदेशी अनुदानको आवश्यकता नरहेको बताए।- रासस/एएनआई
