हिमाल प्रेस 
दमक- झापा क्षेत्र नम्बर ५ मा राष्ट्रिय स्वतन्त्र पार्टी (रास्वपा) का उम्मेदवार एवं पार्टीका वरिष्ठ नेता बालेन्द्र शाहले आफ्नो अग्रतालाई निकै बलियो बनाएका छन्। बिहीबार सम्पन्न प्रतिनिधिसभा सदस्य निर्वाचनको जारी मतगणनामा शाहले प्रतिस्पर्धी उम्मेदवारहरूलाई निकै पछाडि छाड्दै विजयतर्फको यात्रा तय गरेका हुन्।
निर्वाचन अधिकृतको कार्यालयले सार्वजनिक गरेको पछिल्लो विवरण अनुसार कुल ४४ हजार ३५० मत गणना हुँदा बालेन्द्र शाहले २८ हजार १५२ मत प्राप्त गरेका छन्। यो मत संख्या गणना भएको कुल मतको ठूलो हिस्सा हो, जसले उनको चुनावी पकडलाई प्रस्ट पार्छ।
यता, नेकपा एमालेका अध्यक्ष एवं पूर्वप्रधानमन्त्री केपी शर्मा ओली भने यो क्षेत्रमा निकै पछाडि देखिएका छन्। ओलीले हालसम्म मात्र सात हजार ३९३ मत प्राप्त गरेका छन्, जुन शाहको तुलनामा करिब चार गुणा कम हो। ओलीको यो अवस्थालाई राजनीतिक वृत्तमा निकै अर्थपूर्ण रूपमा हेरिएको छ।
अन्य प्रतिस्पर्धीहरूमध्ये श्रम संस्कृति पार्टीका समीर तामाङले चार हजार ११५ मत ल्याएर तेस्रो स्थानमा आफूलाई उभ्याएका छन्। त्यसैगरी, नेपाली कांग्रेसकी उम्मेदवार मन्धरा चिमरियाले ८२४ मत पाएकी छन् भने नेपाली कम्युनिस्ट पार्टीका रञ्जित तामाङले ७३६ मत जोडेका छन्। राष्ट्रिय प्रजातन्त्र पार्टीका उम्मेदवार लक्ष्मीप्रसाद संग्रौलाले भने ६६२ मत मात्र प्राप्त गरेको निर्वाचन कार्यालयले जानकारी दिएको छ।
