हिमाल प्रेस 
काठमाडौँ- पश्चिमी न्यूनचापीय प्रणाली सक्रिय भएसँगै काठमाडौँको जर्सिनपौवा, मातातीर्थलगायतका क्षेत्रमा भारी असिनापानी परेको छ।
जल तथा मौसम विज्ञान विभागअन्तर्गतको मौसम पूर्वानुमान महाशाखाका अनुसार आज साँझसम्म उपत्यकासहित कोशी, बागमती र गण्डकी प्रदेशका केही स्थानमा हल्कादेखि मध्यम वर्षा तथा उच्च पहाडी र हिमाली भेगमा हिमपातको सम्भावना रहेको छ।
मौसमविद् विभूती पोखरेलले माथिल्लो वायुमण्डलमा विकसित भएको यो प्रणाली साँझपछि कमजोर हुँदै जाने र मौसममा क्रमिक सुधार आउने जानकारी दिइन्।
लुम्बिनी, कर्णाली र सुदूरपश्चिम प्रदेशका पहाडी क्षेत्रमा पनि छिटपुट वर्षाको पूर्वानुमान गरिएको छ भने तराईका जिल्लाहरूमा बिहीबार बिहानसम्म हुस्सु र कुहिरो लाग्ने देखिएको छ।
मौसममा आएको यस परिवर्तनले हवाई र सडक यातायातमा सामान्य असर पर्न सक्ने भएकाले महाशाखाले आवश्यक सतर्कता अपनाउन अनुरोध गरेको छ।
