सहरमा आज : नाटक र फिल्मसँगै साहित्यिक कार्यक्रम र चित्रकला प्रदर्शनी

सुस्मिता बजगाईं १३ मंसिर २०८२ ८:२६
42
SHARES
सहरमा आज : नाटक र फिल्मसँगै साहित्यिक कार्यक्रम र चित्रकला प्रदर्शनी

काठमाडौँ- आज मंसिरको दोस्रो शनिबार। सधैँझैँ केही समय यता हामीले साताको प्रत्येक शनिबार उपत्यकामा हुने र भइरहेका मनोरञ्जनात्मक गतिविधिहरूको विवरण संकलन गरेका छौँ।

जो उपत्यकामै हुनुहुन्छ, उहाँहरूको लागि बिदाको दिन सदुपयोग गर्दै केही सिक्ने र बुझ्ने मौका मिल्न सक्छ।

समग्रमा यो साता थिएटरमा तीन नाटक मञ्चन भइरहेको छ। ‘के? अस?’, ‘महारानीको जात्रा’ र ‘मिलारेपा’। हलमा नेपाली, हिन्दी र अंग्रेजी फिल्म प्रदर्शन भइरहेका छन्। त्यस्तै साहित्यिक कार्यक्रम र विभिन्न स्थानमा चित्रकला प्रदर्शनी पनि चलिरहेको छ।

हेरौं, यो साता कहाँ के के हुँदैछ

कवि ऋजन मायालुको कवितासंग्रह ‘घुम्ती बिक्रीमा छ’ लोकार्पण

आज कवि ऋजन मायालुको कवितासंग्रह ‘घुम्ती बिक्रीमा छ’ लोर्कापण हुँदैछ। पुस्तक थापागाउँस्थित लेखक कुञ्जमा दिउँसो १ बजे सुरु हुनेछ। कार्यक्रममा पुस्तकबारे विमर्शमा लेखक मायालुसहित समीक्षक डा. अशोक थापा र प्रेमिला राई उपस्थित हुनेछन्। पुस्तक पेज टर्नरले प्रकाशन गरेको हो।

पुरूषोत्तम बजगाईंको उपन्यास ‘नीलो प्रेम’ को प्रेमोत्सव

पुरूषोत्तम बजगाईंको उपन्यास ‘नीलो प्रेम’ को विषयमा आज छलफल कार्यक्रम हुँदैछ। किशोर–किशोरी उमेर समूहलाई मुख्य केन्द्र बनाउँदै लेखिएको उपन्यास प्रेम कथामा आधारित छ।

अहिले यो उपन्यासका गहकिला संवादले सामाजिक सञ्जाल टिकटकमा चर्चा बटुलिरहेको छ। यसै सन्दर्भमा आज लेखक र पत्रकार दीपक सापकोटाबीच किताब संवाद हुँदैछ। कार्यक्रम कमलादीस्थित नेपाल प्रज्ञा प्रतिष्ठानको डबलीमा १ बजेदेखि सुरु हुनेछ।

कवि डिल्लीराम शर्माको कवितासंग्रह ‘प्राची का सूर्य’ लोकार्पण
कवि डिल्लीराम शर्माको कवितासंग्रह ‘प्राची का सूर्य’ पनि आज लोकार्पण हुँदैछ। कार्यक्रम पुतलीसडकस्थित ग्रिनलिफ फुडमा दिउँसो २ः ३० बजे सुरु हुनेछ।

पर्यटन बोर्डमा फोटो नेपाल अन्तर्राष्ट्रिय समुह चित्रकला प्रदर्शनी

भृकुटीमण्डपस्थित नेपाल पर्यटन बोर्डमा मंसिर १२ देखि अन्तर्राष्ट्रिय चित्रकला प्रदर्शनी चलिरहेको छ। तीनदिने प्रदर्शनको भोलि अन्तिम दिन हो। प्रदर्शनी नेपाल पर्यटन बोर्डको दृश्य संवाद अभियान ‘फोटो नेपाल’ को सयौं संस्करणको अवसरमा सुरू गरिएको हो। प्रदर्शनीमा नेपाल, रसिया, अमेरिका, बेलायत, जापान, भारत, बंगलादेश, घानालगायत देशका ४५ भन्दा बढि कलाकारहरू सहभागी छन्। उनीहरूकै विविध कलाकृतिसहित प्रदर्शनीमा नेपाली संस्कृति, प्राकृतिक दृश्य, अध्यात्मिकता, सहर परिवर्तन र समसामयिकतामा आधारित तस्बिरहरू राखिएको छ।

‘फोटो काठमाडौँ’ को छैटौँ संस्करण अन्तर्गत अन्तर्राष्ट्रिय फोटोग्राफी महोत्सव जारी

उपत्यकाको तीनै जिल्लामा कात्तिक २८ देखि ‘फोटो काठमाडौँ’ को छैटौँ संस्करण अन्तर्गत अन्तर्राष्ट्रिय फोटोग्राफी महोत्सव चलिरहेको छ। काठमाडौँको बबरमहलस्थित नेपाल कला परिषद् लाई महोत्सवको मुख्य स्थल बनाइएको छ। साथै, ललितपुरस्थित पाटनको मङ्गाहिति र च्यासल, कीर्तिपुरस्थित त्रिभुवन विश्वविद्यालय, नक्सालको नन्दीकेशर बगैँचा र भक्तपुरस्थित थिमि (मध्यपुर) को निगू पुखुमा पनि चलिरहेको छ। मंसिर २८ सम्म चल्ने प्रदर्शनी प्रवेश नि:शुल्क छ।

महोत्सवमा नेपाली फोटोग्राफर तथा फिल्म निर्माताहरूका साथै स्यान्टियागोदेखि लुबुम्बासी र क्विटोदेखि डकारसम्मका ३० भन्दा बढी नेपालीसहित ग्लोबल साउथका कलाकारको सिर्जना राखिएको छ। साथै उपत्यकाका विभिन्न ठाउँमा प्रदर्शनी, स्लाइड सो प्रोजेक्सन, कार्यशाला, कलाकारसँग वार्ता, प्यानल छलफल, पोर्टफोलियो समीक्षा र फिल्म प्रदर्शनी पनि चलिरहेको छ।

थिएटरमा तीन नाटक

कौसी थिएटरमा ‘के? अस?’

टेकुस्थित कथा घेराको कौसी थिएटरमा मंसिर १२ देखि नाटक ‘के? अस?’ मञ्चन भइरहेको छ। नाटकका लेखक तथा निर्देशक इलुममणि दीक्षित र विजय आनन्द ताम्राकार हुन्। नाटकको मुख्य भूमिकामा उनीहरू नै देखिएका छन् यी दुई पात्रमार्फत नाटकमा मानवीय भावना अराजकता र मनोविज्ञानको खोज प्रस्तुत गर्न खोजिएको छ। स्टुडियो आकारको प्रस्तुति रहेको नाटक डार्क कमेडीमा आधारित छ। यही मंसिर २१ सम्म नाटक मंगलबार बाहेक साताको प्रत्येक दिन साँझ ५ः३० नियमित मञ्चन हुनेछ।

कान्तिपुर थिएटरमा ‘महारानीको जात्रा’

गैरीधारा नक्सालस्थित कान्तिपुर थिएटरमा कात्तिक २४ देखि नाटक ‘महारानीको जात्रा’ मञ्चन भइरहेको छ। कान्तिपुर फिल्म एकेडेमीको प्रोडक्सनमा बनेको नाटकका परिकल्पनाकार तथा निर्देशक दिपल बराल हुन्। नाटक मंसिर २० सम्म मञ्चन हुनेछ। रमेश पुरी निर्माता रहेको नाटक बुधबार बाहेक साताको प्रत्येक दिन साँझ ५ बजे मञ्चन हुनेछ। आज शनिबार दुई सो छ, दिउँसो १ बजे र साँझ ५ बजे।

नाटकमा कलाकारका रुपमा उषा रजक, राज न्यौपाने, सुहाना आचार्य, निकिता आचार्य, दिपेश गजुरेल, विकल्प ओली, ज्योति लामा, समीर शर्मा, विशाल कार्की, गोविन पौडेल, श्रीधर गौतम, प्रयास खत्री, विमल यादव, मनोज तामाङ, बिरान दहनी, स्वेता चौलागाईं र कुशल बास्कोटाले अभिनय गरेका छन्। यी सबै कलाकार कान्तिपुर फिल्म एकेडेमी र थिएटरका विद्यार्थी तथा सदस्य हुन्।

मण्डलामा ‘मिलारेपा’
थापागाउँस्थित मण्डला थिएटरमा कात्तिक १८ देखि नाटक ‘मिलारेपा’ मञ्चनरत छ। नाटक तिब्बती बौद्ध धर्मगुरू मिलारेपाको जीवनकथामा आधारित छ। नाटकमा मिलारेपाको बाल्यकालदेखि तपस्या गरेर ज्ञान प्राप्तिसम्मको यात्रा प्रस्तुत गरिएको छ। मिलारेपाको भूमिकामा रूपेश लामाले अभिनय गरेका छन्।

चाङ् ङ्योन हेरूकले लेखेको नाटकको नेपाली नाट्य रूपान्तरण रविन तामाङले गरेका हुन्। बुद्धि तामाङ र उमेश तामाङ संयुक्त निर्देशनमा मञ्चन भएको हो। नाटक आगामी मंसिर २१ सम्म मञ्चन हुनेछ। नाटकमा अन्य कलाकार रमिला मोक्तान, विकाश लामा, सानु मार्यौं तामाङ, रस्मिला तामाङ, रिया लामा विजय तामाङ ब्लोन, बल बहादुर राई, मिलन कार्की, मणिकुलुङ राई, रोहनी लामा, पुस्कर कार्की, विश्व स्याङ्बो, सविता थिङ, सुनिता तामाङ दोङ, सुदिप खतिवडा, विजय टुवा, रत्न मंगगल, टसी लामा, अजय लामा, पवन कुमार गोले र सविता तामाङको अभिनय छ।

हलमा कुनकुन फिल्म?

हर्ष
मंसिर १२ देखि हलमा नेपाली फिल्म ‘हर्ष’ प्रदर्शन भइरहेको छ। फिल्मका निर्देशक एकता पौडेल हुन्। यो उनको डेब्यु फिल्म हो। पारिवारिक कथामा बनेको फिल्ममा वर्षा राउत, खगेन्द्र लामिछाने र बाल कलाकार साइमन वादी मुख्य भूमिकामा छन्।
फिल्म क्युएफएक्स सिनेमाअन्तर्गत शनिबार उपत्यकाको राइजिङ मल, भाटभटेनी भक्तपुर, छाया सेन्टर, दरबार सिनेम्याक्स, सिभिल मल, लबिम मल, सिटी स्क्वायर मलमा १४ सो छ।
वान सिनेमाज अन्तर्गत आइप्लेक्स मल र कालीमाटी ट्रेड सेन्टर, आइएनआई सिनेमा अन्तर्गत लोत्से मल, विश्वज्योति मल र एनबी सेन्टर, एफक्युब सिनेमाज, बिग मुभिज, बिएसआर मुभिज, रञ्जना सिनेप्लेक्स, कीर्तिपुर सिनेप्लेक्स र अष्टनारायण हलमा फिल्मले सो पाएको छ।

तेरे इस्क मे

हिन्दी फिल्म ‘तेरे इस्क मे’ मंसिर १२ देखि नेपालमा प्रदर्शन भइरहेको छ। फिल्मको मुख्य भूमिकामा अभिनेता धनुष र कृति सेनन छन्। प्रेम कथामा बनेको फिल्म एक्सन र ड्रामा जनरामा बनेको छ। फिल्मका निर्देशक आनन्द एल.राय हुन्।

फिल्म क्युएफएक्स सिनेमाअन्तर्गत शनिबार उपत्यकाको राइजिङ मल, छाया सेन्टर, लबिम मल, भाटभटेनी भक्तपुर, सिभिल मल, सिटी स्क्वायर मल, दरबार सिनेम्याक्समा ३९ सो छ। वान सिनेमाज अन्तर्गत आइप्लेक्स मल र कालीमाटी ट्रेड सेन्टर, आइएनआई सिनेमा अन्तर्गत लोत्से मल, विश्वज्योति मल र एनबी सेन्टर, एफक्युब सिनेमाज, बिएसआर मुभिज, बिग मुभिज, रञ्जना सिनेप्लेक्स, कीर्तिपुर सिनेप्लेक्समा उच्च सोसहित फिल्म चलिरहेको छ।

जारी २

उपेन्द्र सुब्बाको निर्देशनमा बनेको फिल्म ‘जारी २’ कात्तिक २१ देखि हलमा प्रदर्शन भइरहेको छ। फिल्ममा १० वर्षे द्वन्द्वले एक परिवारमा पारेको असरलाई सांस्कृतिक र भावनात्मक ढंगले प्रस्तुत गरिएको छ। फिल्ममा दयाहाङ राई, मिरुना मगर, विजय बराल, बुद्धि तामाङ, ऋचा शर्मा, पुष्कर गुरुङ, प्रेम सुब्बा, कमलमणि नेपाल, अनिल सुब्बा, रेखा लिम्बू र सिर्जना निङ्लेखुलगायत कलाकारको अभिनय छ।

क्युएफएक्स सिनेमाअन्तर्गत शनिबार उपत्यकाको सिभिल मल, लबिम मल र सिटी स्क्वायर मलसँगै एफक्युब सिनेमाज, रञ्जना सिनेप्लेक्स, बिएसआर मुभिज फिल्म ‘जारी २’ चलिरहेको छ।

मन बिनाको धन

टंक बुढाथोकी निर्देशित फिल्म ‘मन बिनाको धन’ पनि कात्तिक २१ देखि नै हलमा प्रदर्शन भइरहेको छ। फिल्म बाल गायक अशोक दर्जीको वास्तविक जीवनमा आधारित कथामा आधारित छ। बालगायक दर्जीको संघर्ष, सफलतामार्फत शिक्षामूलक सन्देश प्रस्तुत गरिएको छ। गायक दर्जीसँगै फिल्ममा कलाकार रमा थपलिया, सरोज खनाल, नीता ढुंगाना, रमेश विश्वकर्मा, भोला सापकोटा, बुद्धि तामाङ, रवीन्द्र झा, उत्सव सापकोटा, एआर बुढाथोकी र बिना राउतको अभिनय गरेका छन्।।

शनिबार क्युएफएक्स सिनेमाअन्तर्गत उपत्यकाको भाटभटेनी भक्तपुर, वान सिनेमाज अन्तर्गत आइप्लेक्स मल, रञ्जना सिनेप्लेक्स र कीर्तिपुर सिनेप्लेक्स फिल्मको सो छ।

परान
दीपकप्रसाद आचार्य ‘काकु’को निर्देशनमा बनेको फिल्म ‘परान’ यही कात्तिक १४ देखि हलमा प्रदर्शन भइरहेको छ। फिल्मको मुख्य भूमिकामा छन् नीर शाह। पारिवारिक कथामा बनेको फिल्मले सन्तानकै काखमा प्राण त्याग्न चाहाने बाआमाको कथा भनेको छ। फिल्ममा सहायक कलाकारमा बुद्धि तामाङ, महेश त्रिपाठी, पूजा चन्द, केकी अधिकारी, अञ्जना बराइली, प्रविण खतिवडा, बाल कलाकार आर्यदीप आचार्यको अभिनय छ।

क्युएफएक्स सिनेमाअन्तर्गत शनिबार उपत्यकाको राइजिङ मल, दिरबार सिनेम्याक्स, सिभिल मल, लबिम मल, सिटी स्क्वायर मल, भाटभटेनी भक्तपुर र छाया सेन्टरमा फिल्मको २३ सो छ। वान सिनेमाज अन्तर्गत आइप्लेक्स मल र कालीमाटी ट्रेड सेन्टरमा ६ सो, आइएनआई सिनेमा अन्तर्गत लोत्से मल, विश्वज्योति मल र एनबी सेन्टरमा ९ सो, बिग मुभिज, एफक्युब सिनेमाज, रञ्जना सिनेप्लेक्स, बिएसआर मुभिज, कीर्तिपुर सिनेप्लेक्स फिल्म ‘परान’ चलिरहेको अन्य हल हुन्।

जेरी अन टप
असोज ३१ देखि हलमा नेपाली फिल्म ‘जेरी अन टप’ प्रदर्शन भइरहेको छ। फिल्ममा प्रेम कथासहित हिमाल आरोहण गर्नेको कथा समेटिएको छ। फिल्ममा अनमोल केसी, जसिता गुरुङ र आँचल शर्मा मुख्य भूमिकामा छन्। फिल्मका निर्देशक सुयोग गुरुङ हुन्।

क्युएफएक्स सिनेमाअन्तर्गत शनिबार उपत्यकाको सिटी स्क्वायर मल, वान सिनेमाज अन्तर्गत आइप्लेक्स मल, रञ्जना सिनेप्लेक्स र एफक्युब सिनेमाजमा फिल्म ‘जेरी अन टप’ चलिरहेको छ।

विक्ड फर गुड
हलिउड फिल्म ‘विक्ड फर गुड’ नेपालमा प्रदर्शन भइरहेको छ। जोन एम. चु निर्देशित फिल्म पारिवारिक जनरामा बनेको छ। फिल्ममा सिन्थिया एरिभो, एरियाना ग्रान्डे, जोनाथन बेलीलगायत कलाकारको अभिनय छ।

क्युएफएक्स सिनेमाअन्तर्गत शनिबार उपत्यकाको दरबार सिनेम्याक्स, छाया सेन्टर र लबिम मलमा फिल्मको ५ सो छ।

प्रकाशित: १३ मंसिर २०८२ ८:२६

प्रतिक्रिया

Leave a Reply

Your email address will not be published. Required fields are marked *

eleven + twenty =


© Nepali horoscope

© Gold Price Nepal

© Nepal Exchange Rates
© Nepal weather forecast