हिमाल प्रेस 
काठमाडौँ- नेपालको इतिहासमा भीमसेन थापा एउटा यस्तो नाम हो, जसले देशको राजनीतिक, सामाजिक, र सैनिक परिवर्तनमा महत्त्वपूर्ण भूमिका खेलेका थिए। युगकवि सिद्धिचरण श्रेष्ठले रचना गरेको खण्डकाव्य ‘भीमसेन थापा’मा आधारित नाटक अब रंगमञ्चमा मञ्चन हुँदैछ।
निर्देशक सनम कुमार बैरागको परिकल्पना र निर्देशनमा नाटक बेलायत र नेपालका विभिन्न सहरमा मञ्चन हुन लागेको हो। नाटक युगकवि सिद्धिचरण श्रेष्ठकाे खण्डकाव्य ‘भीमसेन थापा’ मा आधारित छ।
भीमसेन थापाको योगदानलाई युगकवि श्रेष्ठले खण्डकाव्यमा लेखेका छ्न्। भीमसेन थापा नेपालको पहिलो प्रधानमन्त्री थिए, जसले राष्ट्रको संरक्षण र स्वाधीनताका लागि धेरै संघर्ष गरे। उनको जीवन राजनीतिक उतारचढाव, सैनिक युद्ध र व्यक्तिगत संघर्षले भरिएको थियो।
भीमसेन थापाको योगदानलाई पुस्तौँ पुस्तासम्म पुर्याउने उद्देश्यले नाटक तयार पारिएको निर्देशकले बताए। यसअघि नाटक बेलायतमा मञ्चन गरिसकेको र पुन: देखाउन लागेको निर्देशक बैरागले बताए। नाटकमा भीमसेन थापाको भूमिका सनम कुमार बैराग आफैँले खेलेका छन् भने अन्य कलाकार सामन्ता तामाङ, सुरेश श्रेष्ठ, गोपाल बस्नेत र सुशन गुरुङ रहेका छन्।
नाटक यही अप्रिल २६ देखि मे महिनाभर बेलायतकाे लन्डन, रिडिङ, विलविच, अल्डरसट, स्कटल्यान्ड लगायतका विभिन्न सहरमा मञ्चन हुनेछ। नेपालमा काठमाडौँको मण्डला थिएटरमा दसैँ तिहारपछि १५ शो मञ्चन गरिनेछ। काठमाडौँपछि पोखरा, चितवन, बिर्तामोड, धरान लगायतका सहरमा नाटक मञ्चन गरिने टिमको तयारी छ।
निर्देशक बैराग पछिल्लो समय लन्डनमा बस्दै आएका छन्। उनले पछिल्लो समय चलचित्र ‘कैदीको पत्र’ निर्देशन गरेका थिए। यसअघि उनले सन् २०१६ देखि बेलायतमा नै नाटक ‘समय दृश्य’ र ‘जिगिशा’ मञ्चन गरिसकेका छन्।
