हिमाल प्रेस 
काठमाडौँ- बौद्धस्थित तारागाउँ नेक्स्टमा बृहत् कला प्रदर्शनी हुने भएको छ। जनवरी २५ देखि सुरू हुने प्रदर्शनीमा दक्षिण एसियाका दश उत्कृष्ट महिला कलाकारको सिर्जना प्रस्तुत गरिने आयोजकले जनाएको छ।
आयोजकका अनुसार प्रदर्शनीले महिलाको सम्मानसँगै दमनका गर्ने दक्षिण एसियाली समाजको गहिरो र जटिल संरचनाहरूको विश्लेषण गर्नेछ। शिल्पकला, फोटोग्राफी, इन्स्टलेसन, भिडियो र प्रदर्शनजस्ता कला माध्यमबाट प्रदर्शनीका कलाकारहरूले महिलाको जीवनीलाई पुनः परिभाषित र आकार दिनेछन्।
प्रदर्शनीमा भारतका ४, नेपालका ३ र श्रीलंका, पाकिस्तान र बंगलादेशका १/१ महिला कलाकारका सिर्जना समावेश गरिनेछ।नेपालका अश्मिना रञ्जित, बिधाता केसी र उमा बिष्टसँगै भारतबाट अनिता दुबे, मिथु सेन, शेबा छाच्छी र पुष्पमाला एन सहभागी हुनेछन्। त्यस्तै, श्रीलंकाकी अनोली पेरेरा, पाकिस्तानकी नाइजा खान र बंगलादेशकी तायबा बेगम लिपीका सिर्जना प्रदर्शनीमा राखिनेछ।
दुई दिनसम्म चल्ने प्रदर्शनीले पितृसत्तात्मक संरचना, उपनिवेशकालीन धरोहर र लैंगिक राजनीतिजस्ता विषय सम्बोधन गर्नेछ।
प्रदर्शनीको औपचारिक उद्घाटनअघि जनवरी २३ मा डिकोलोनाइजिङ द फेमिनः आर्ट, एजेन्सी एण्ड जेन्डर्ड पोलिटिक्स इन साउथ एसिया’ शीर्षकमा छलफलसमेत आयोजना गरिएको छ।
नेपालसहित दक्षिण एशियाली देशका महिला अधिकारका विषय र संघर्षसँग जोड्ने प्रयासले प्रदर्शनी आयोजना गरिएको सराफ फाउन्डेसन तथा तारागाउँ नेक्स्टकी संस्थापक निर्देशक नमिता साराफले बताइन्। ‘प्रदर्शनीमार्फत हामीले भारत, पाकिस्तान, श्रीलंका, र बंगलादेशका महिलाहरूको संघर्षसँगै नेपाली महिलाहरूका समस्यालाई बाहिर ल्याउन चाहान्छौँ’, उनले भनिन्।
डा. अर्शिया लोखन्डवालाको परिकल्पनामा हुने ‘फेमिनिस्ट फ्युचरः आर्ट, एक्टिभिजम र साउथ एसियन वुमनहुड’ नामक प्रदर्शनीले दक्षिण एसियामा नारीवाद, कला र सक्रियताका जटिल पक्ष उजागर गर्ने आयोजकको भनाइ छ।
तारागाउँ सांस्कृतिक केन्द्रले साराफ फाउन्डेसनको सहकार्यमा प्रदर्शनीको आयोजना गरेको हो।
