हिमाल प्रेस 
पोखरा विमानस्थल
काठमाडौँ- नेपाली कांग्रेसले पोखरा क्षेत्रीय अन्तर्राष्ट्रिय विमानस्थल खराब ऋणमा परेको र यसबाट प्रतिफल प्राप्त नहुने बताएको छ। कांग्रेसले चीनको एक्जिम बैंकको ऋणमा बनेको उक्त विमानस्थल खराब ऋणमा परेको निष्कर्ष निकालेको हो।
सोमबार पार्टी सभापति शेरबहादुर देउवाको निवास बुढानीलकण्ठमा बसेको कार्यसम्पादन समिति बैठकमा यसबारे छलफल भएको हो। कांग्रेसले चीनसँग भएको बीआरआई सम्झौता, उपनिर्वाचन लगायत विषयमा छलफल गर्न आइतबार कार्यसम्पादन समितिको बैठक बोलाएको थियो।
बैठकपछि पत्रकारहरूसँग कुरा गर्दै कांग्रेस प्रवक्ता डा.प्रकाशशरण महतले पोखरा विमानस्थलमा नराम्रो अनुभव भएको बताए। ‘पोखरा विमानस्थलको पनि हाम्रो नराम्रो अनुभव छ,’ उनले थपे, ‘त्यसको प्रतिफल नआउने सुनिश्चित भइसक्यो। यो खराब ऋणमा पर्यो।’
बैठकमा बीआरआईअन्तर्गतका परियोजनामा ऋण स्वीकार नहुने र अनुदान मात्रै लिने कांग्रेसले दोहोर्याएको छ। यसअघि चीनले अनुदान प्रतिवद्धता गरेकै आयोजना अगाडि नबढेको विषयमा पनि कांग्रेसले ध्यानाकर्षण गराएको छ।
ती परियोजना अगाडी बढेपछि बीआरआईअन्तर्गतका १० वटा परियोजना पनि अनुदानमा अगाडि बढ्ने कांग्रेसको विश्वास छ। ऋणमा कुनै पनि परियोजना सम्झौता नहुने निस्कर्ष कांग्रेसले सुनाएको छ। उपनिर्वाचनको नतिजा भने सन्तोषजनक नै रहेको महतले बताए।
बैठकमा यसबारे समिक्षा भएको र उपनिर्वाचनबाट पनि कांग्रेस पहिलो पार्टीकै रुपमा स्थापित भएकाले परिणाम सन्तुष्ट नै लिइएको उनको भनाइ छ।
