इटहरीमा मोटरसाइकल दुर्घटना हुँदा युवकको मृत्यु

इटहरी – इटहरीमा मोटरसाइकल दुर्घटना हुँदा एक युवकको मृत्यु भएको छ।

बुधबार इटहरीको आँपगाछी चोकनजिकै इटहरीबाट धरानतर्फ जाँदै गरेको प्रदेश १–०२–०५४ प १७२ नम्बरको मोटरसाइकल आफैँ अनियन्त्रित भएर दुर्घटन हुँदा युवकको मृत्यु भएको हो।

इलाका प्रहरी कार्यालय इटहरीका प्रहरी नायब उपरीक्षक (डीएसपी) लक्ष्मी भण्डारीका अनुसार मृत्यु हुनेमा इटहरी २ ठेगाना भएका नीरज बजगाईँ रहेका छन्। उनी इटहरी–५ तुलसा टोली बस्दै आएको खुलेको छ। यद्यपि उनको लाइसेन्स भएको ठेगाना भने इटहरी–२ रहेको प्रहरीले जनाएको छ।

उनी घटनामा गम्भीर घाइते भएको र उपचारका लागि न्यूरो अस्पताल लगिएको भए पनि उपचारकै क्रममा डाक्टरले मृत घोषित गरेको भण्डारीले जानकारी दिए । घटनाबारे थप अनुसन्धान भइरहेको इटहरी प्रहरीले जनाएको छ ।