हिमाल प्रेस 
काठमाडौँ- एसियन क्रिकेट काउन्सिल (एसीसी) को आयोजनामा आगामी महिना आयोजना हुने यू-१९ एसिया कपको लागि नेपाली टोलीको कप्तान फेरिएका छन्। आज नेपाल क्रिकेट संघ (क्यान)ले टोली घोषणा गर्दै हेमन्त धामीको कप्तानीमा १८ सदस्यीय टोलीको घोषणा गरेको हो।
गएको वर्ष विश्वकप खेल्दा यू-१९ नेपाली टोलीको कप्तानी देव खनालले गरेका थिए। खनालसहित अलराउन्डर गुल्सन झाले युवा टोलीबाट बिदा लिएका छन्। अहिले उनीहरू दुवै सिनियर राष्ट्रियका सदस्य बनेका छन्।
टोलीको उपकप्तानको जिम्मेवारी अर्जुन कुमाललाई दिइएको छ। शक्ति गौचनले टोलीको प्रमुख प्रशिक्षकको जिम्मेवारी पाउदा धिरेन्द्र चन्दलाई सहायक प्रशिक्षक तोकिएको छ ।
एसिया कपमा नेपालको पहिलो खेलमा श्रीलंकासॅंग रहेको छ। एसीसीले शुक्रवार जारी गरेको प्रतियोगिताको खेल तालिका अनुसार मंसिर १४ देखि २३ गतेसम्म हुने प्रतियोगिताको पहिलो खेलमा नेपालले श्रीलंकाको सामना गर्दै प्रतियोगिताको सुरुवात गर्नेछ।
दोस्रो खेलमा मंसिर १६ गते बंगलादेशको सामना गर्ने नेपालले अन्तिम खेलमा मंसिर १८ मा अफगानिस्तानको सामना गर्नेछ । ५० ओभरमा हुने खेल यूएईमा आयोजना हुँदैछ।
एसीसीको आयोजनामा हुने प्रतियोगितामा एसियाका आठ देशले सहभागिता जनाउँदै छन्। प्रतियोगितामा एसियाका ५ टेस्ट राष्ट्र स्वतस् छनोट भएका थिए।
नेपाल, यूएई र जापान गत वर्ष मलेसियामा भएको एसीसी प्रिमियर कपको शीर्ष ३ मा रहेर छनोट भएका थिए। गत अक्टोबरमा भएको यस प्रतियोगितामा यूएईलाई हराउँदै नेपाल च्याम्पियन भएको थियो।
प्रतियोगितामा सहभागी ८ टोलीलाई २ समूहमा विभाजन गरिएको छ। समूह विभाजनमा नेपाल समूह बी मा रहेको छ। नेपाल रहेको समूहमा श्रीलंका, बंगलादेश र अफगानिस्तान रहेका छन्।
समूह ए मा भारत, पाकिस्तान, जापान र यूएई रहेका छन्। हरेक समूहका शीर्ष २ टोलीले सेमिफाइनलमा स्थान बनाउँने छन्। सेमिफाइनलका २ विजेताबीच मंसिर २३ मा फाइनल खेल हुनेछ।
नेपाली टिम
हेमन्त धामी (कप्तान), अर्जुन कुमाल (उपकप्तान), आकाश त्रिपाठी, उत्तम थापा, मयन यादव, नरेन साउद, युनिस विक्रम सिंह ठकुरी, नरेन भट्ट, सन्तोष यादव, युवराज खत्री, रोशन विक, विपिन महतो, राजेश यादव, दयानन्द मण्डल, अपराजित पौडेल, अभिषेक तिवारी, दिलसाद अलि र रन्जित कुमार
