![लोकतान्त्रिक प्रणालीको सुदृढीकरणबाटै मुलुकमा समृद्धि हासिल हुन्छ : पूर्वप्रधानमन्त्री भट्टराई](https://himalpress.com/wp-content/uploads/2024/05/baburam-bhattarai.jpg)
मोरङ- नेपाल समाजवादी पार्टी महाधिवेशन आयोजक समिति संयोजक एवं पूर्वप्रधानमन्त्री डा.बाबुराम भट्टराईले लोकतान्त्रिक प्रणालीको सुदृढीकरणबाट मुलुकमा समृद्धि हासिल हुने बताएका छन्।
नेपाल समाजवादी पार्टी केन्द्रीय महाधिवेशन आयोजक समितिद्वारा मंगलबार विराटनगरमा आयोजित नागरिक संवाद तथा चियापान कार्यक्रम–२०८१ मा उनले निर्वाचित जनप्रतिधिनिलाई जनताले प्रत्यक्ष निगरानी, राजनीतिक स्थिरता, दलको नेतृत्व राम्रो भएमा संघीय गणतन्त्र सृदृढ हुनुका साथै जनता एवं मुलुकमा समृद्धि कायम हुने धारणा राखे।
पूर्वप्रधानमन्त्री डा.भट्टराईले विकास, सुशासन, भ्रष्टाचार नियन्त्रण गर्न संविधानमा रहेका केही कमीकमजोरीलाई सहमतिको आधारमा संशोधन गरी पूर्णता दिनुपर्नेमा जोड दिए। उनले सरकारले प्राविधिक शिक्षालाई प्राथमिकता राख्नुपर्छ भन्दै यसबाट मुलुकलाई आवश्यक पर्ने दक्ष जनशक्ति उत्पादन हुनका साथै विदेशी मुद्राको आर्जन गर्न सकिने विचार राखे।
संयोजक डा.भट्टराईले वर्तमान अवस्थामा युवायुवतीको वैदेशिक अध्ययन र कामका लागि पलायन हुने मोह गम्भीर विषय हो भन्दै उनीहरूको देश र समाजप्रतिको अविश्वासलाई विश्वासमा परिणत गराउन राजनीतिक दल, नागरिक समाजलगायत हामी सबै लाग्नुपर्ने आवश्यकता औँल्याए।
पूर्वप्रधानमन्त्री डा.भट्टराईले राष्ट्रिय सहमतिका आधारमा छिमेक मित्रराष्ट्र भारतसँग कृषि, विद्युत्लगायतका अन्य क्षेत्रका समस्या समाधान गर्न गम्भीररुपमा छलफल गरी मुलुकको चुलिँदै गएको व्यापार घाटा कम गर्नुपर्नेमा जोड दिए।
उनले मुलुकमा आर्थिक चलायमान गर्न कृषिमा आश्रित जनसङ्ख्यालाई सेवा क्षेत्रमा परिचालन गरेमा औद्योगिक उत्पादनको खपत वृद्धि हुनुका साथै उद्योग स्थापनामा स्वदेशी तथा विदेशी लगानी आउने विश्वास व्यक्त गरे।
पूर्वप्रधानमन्त्री डा.भट्टराईले बैंकिङ क्षेत्रले औद्योगिक एवं पूर्वाधार क्षेत्रमा लगानी गर्नुपर्ने जनाउँदै वित्तीय संस्था एवं बैंकबाट लिएको ऋण नतिर्न अफवाह फैलाउनेलाई ऐन, नियमअनुसार कारबाही गर्नुपर्ने सुझाव दिए।
कार्यक्रममा मनमोहन प्राविधिक विश्वविद्यालयका रजिष्ट्रार डा.दिलनाथ फुयाँल, नेपाल उद्योग परिसंघका प्रदेश अध्यक्ष पवन शारडा, अधिकारकर्मी उत्तम ढुंगेल, शिक्षाकर्मी गोपाल गेलाल, समाजसेवी विजयहरि शर्मालगायतले विभिन्न जिज्ञासा राखेका थिए।