धवलागिरि र अन्नपूर्ण हिमाल चढ्न ४० जनाले लिए अनुमति

हिमाल प्रेस २ वैशाख २०८१ २१:२१
16
SHARES
धवलागिरि र अन्नपूर्ण हिमाल चढ्न ४० जनाले लिए अनुमति

म्याग्दी- चालु वसन्तयाममा म्याग्दीमा रहेका धवलागिरि र अन्नपूर्ण हिमाल आरोहणका लागि ४० जनाले अनुमति लिएका छन्।

धवलागिरि गाउँपालिका-४ मा रहेको विश्वको सातौँ (८,१६७ मिटर) अग्लो धवलागिरि हिमाल चढ्न १५ र अन्नपूर्ण गाउँपालिका-४ मा रहेको ८०९१ मिटर अग्लो अन्नपूर्ण प्रथम हिमाल आरोहणका लागि २५ जनाले अनुमति लिएका पर्यटन विभागले जनाएको छ।

विभागका वरिष्ठ अधिकृत दिलीपकुमार महर्जनका अनुसार धवलागिरि आरोहणका लागि एउटा समूहका १० जना पुरुष र पाँच जना महिला तथा अन्नपूर्ण आरोहणका लागि तीन वटा समूहका १४ जना पुरुष र ११ जना महिलाले अनुमति लिएका हुन्।

धवलागिरि आरोहण अनुमतिबापत ३५ लाख ७० हजार आठ सय ४० र अन्नपूर्ण आरोहण अनुमति बापत ५९ लाख ६१ हजार सात सय ८० रोयल्टी (सलामी दस्तुर) संकलन भएको विभागले जनाएको छ। विदेशी र स्वदेशी आरोही, शेर्पा, पथप्रर्दशक, भरिया र सहयोगी आधार शिविर पुग्न थालेका धवलागिरि गाउँपालिका-४ का वडा सदस्य हरिप्रसाद तिलिजाले बताए।

अन्नपूर्ण गाउँपालिका अध्यक्ष भारतकुमार पुनले अन्नपूर्ण प्रथम हिमालको आधार शिविरमा आरोही र पर्यटकको चहलपहल बढेको बताए।

गत शरदयाममा चार वटा समूहका १२ जना पुरुष र ११ जना महिला पर्वतारोहीले धवलागिरि हिमाल आरोहणका लागि अनुमति लिएका थिए। शरदयाममा अन्नपूर्ण हिमाल आरोहण गर्न कसैले पनि अनुमति लिएका थिएनन्।

यसैबीच अस्ट्रेलियाकी ४७ वर्षीया पर्वतारोही एली पेपरले आइतबार दिउँसो १२ बजेर ७ मिनेटमा अक्सिजन बिना अन्नपूर्ण प्रथम हिमालको आरोहण गरेकी छन्। पेपरले सेभेन समिट ट्रेकका पथप्रर्दशक मिकेल शेर्पा र निमा शेर्पाको सहयोगमा अक्सिजनबिना अन्नपूर्ण आरोहण गरेको सेभेन समिट ट्रेक्सका अध्यक्ष मिङ्मा शेर्पाले बताए।

शेर्पाका अनुसार नेपाली पर्वतारोही १७ वर्षीय निमा रिन्जी शेर्पाले ४ दिनअघि अक्सिजनबिनै अन्नपूर्णको सफल आरोहण गरेका थिए। पेपरले दुई वर्षभित्र विश्वका आठ हजार मिटर अग्ला १४ वटा हिमाल आरोहण गर्ने लक्ष्य राखेकी छन्।

पर्यटन विभागको पछिल्लो विवरण अनुसार चालु यामका लागि नेपालका १९ वटा हिमाल आरोहण गर्न ४० देशका पाँच सय १२ जनाले अनुमति लिएका छन्। उनीहरूबाट ३४ करोड ४३ लाख ९९ हजार छ सय ५६ रोयल्टी संकलन भएको विभागले जनाएको छ। रासस

प्रकाशित: २ वैशाख २०८१ २१:२१

प्रतिक्रिया

Leave a Reply

Your email address will not be published. Required fields are marked *

eighteen − 4 =