‘काम गर्ने इच्छाशक्ति भए बाँझो जग्गाबाटै लाखौँ आम्दानी हुन्छ’

हिमाल प्रेस २४ चैत २०८० १७:२८
12
SHARES
‘काम गर्ने इच्छाशक्ति भए बाँझो जग्गाबाटै लाखौँ आम्दानी हुन्छ’

बाँके- बाँकेको राप्ती सोनारी गाउँपालिका–५ बिनौना ललहीका ४५ वर्षीय टेकराज थारूको दैनिकी तरकारी गोडमेल र स्याहारसुसारमै बित्ने गर्दछ। उनको आम्दानीको स्रोत नै खेतबारी हो। टेकराजका धेरै साथीहरू रोजगारीका लागि विदेश पुगेका छन् कतिपय साथी मजदुरी गर्न नेपालगञ्जमा भौँतारिरहेका छन्। उनी भने तरकारी खेती छोडेर रोजगारी गर्नेतिर कहिल्यै सोचेनन्।

‘मेरो जागिर भने पनि रोजगारी भने पनि यही तरकारीखेती हो। बिहानदेखि साँझसम्म यहीँ काम गर्छु’,आफूले गरेको तरकारीखेती देखाउँदै टेकराजले भने,‘आफ्नो घरमा बसेर तरकारीखेती गर्दै आएको छु, कुनै सिजनमा सोचेभन्दा राम्रो आम्दानी हुन्छ,कहिले अलि थोरै हुन्छ।’

टेकराजले आफूसँगै घरपरिवारका सदस्यहरूलाई पनि तरकारीखेतीको काममा लगाउने गरेका छन्। तरकारीखेतीबाटै जीवन निर्वाह गर्दै आएका उनले वार्षिक करिब १० देखि १२ लाखसम्म कमाई गर्ने गरेको बताए।

व्यावसायिक तरकारीखेतीमा दैनिक श्रम गर्ने उनलाई आफ्नै खेतबारीमै विदेशमा पाइनेभन्दा उत्तम रोजगारी मिलेको अनुभूति हुन्छ। विगतमा उनी निर्वाहमुखी खेती गर्दै आएपनि पछिल्लो एक दशकदेखि व्यावसायिक तरकारीखेती गर्दै आएका छन्। बाह्रैमास उनको खेतबारी हराभरा देखिन्छ। मौसमी र बेमौसमी तरकारीखेती गर्ने उनको दैनिकी पनि निकै व्यस्त हुन्छ।

‘परिवारसँगै हाँसीखेली काम गर्न पाइएको छ,परिवारमा दुःख पर्दा सहयोग हुन्छ’,टेकराजले भने,‘कोही बिरामी पर्दा विदेशबाट भनेकै बेला सहयोग गर्न घर आउँछु भन्न पाइँदैन,सबै परिवार घरमा हुँदा एकअर्काका लागि पनि निकै सहयोग पुगेको छ।’

अहिले उनको खेतबारीमा काँक्रा, गोलभेँडा, फर्सी, खुर्सानीलगायत तरकारी बिक्री गर्ने अवस्थामा छन् भने घिरौँला, तोराय, लौका, तर्भुजलगायत तरकारी तयार हुँदै गएका छन्। रोजगारीको खोजीमा युवा जनशक्ति विदेश पलायन बढ्दो छ। स्वदेशमा रोजगारीको सम्भावना नभएको भन्दै विदेश पस्ने युवाका लागि टेकराज प्रेरणाको स्रोत बनेका छन्।

उत्पादित कृषि उपज घरबाटै बिक्री हुने गरेको उनले बताए। ‘मिहिनेत र काम गर्ने इच्छाशक्ति हुने हो भने पैसा कमाउन विदेश नै जानुपर्दैन। यहाँ पनि सम्भावना छन्। मिहिनेत गर्न सके बाँझो जग्गाबाटै लाखौँ आम्दानी गर्न सकिन्छ,’ टेकराजले भने,‘धनआर्जनका लागि सरकारी जागीर खानैपर्छ वा विदेश पुग्नुपर्छ भन्ने सोच मसँग छैन।’ बारीमा तरकारी रोपेर पनि स्वरोजगार बन्न सकिने भन्दै उनले यसमा सरकारले प्रोत्साहन गर्न जरूरी रहेकामा जोड दिए।

विगतमा गहुँ, मकै लगाउने जग्गामा टेकराजले अहिले मौसमी तथा बेमौसमी तरकारी उत्पादन गर्दै आएका छन्। परिवारका लागि मुख्य आयस्रोत भनेकै तरकारी खेती हो।

टेकराजको तरकारीखेती देखेर अहिले ललही गाउँका अन्य किसान पनि व्यावसायिक तरकारीखेतीतर्फ आकर्षित हुन थालेका छन्। रोजगारीका लागि विदेश नै पुग्नुपर्छ भन्ने मानसिकता युवा पुस्ताले हटाउनुपर्ने अर्का कृषक मधु थारुले बताइन्।

राप्ती सोनारी गाउँपालिकाले किसानलाई बगरखेतीतर्फ आकर्षित गर्न अनुदान कार्यक्रम ल्याएको छ। बगरखेती गर्ने किसानलाई पाँच लाखसम्मको अनुदान दिने कार्यक्रम रहेको गाउँपालिका कृषि शाखा प्रमुख चन्दाकुमारी शाहीले जानकारी दिइन्।

प्रकाशित: २४ चैत २०८० १७:२८

प्रतिक्रिया

Leave a Reply

Your email address will not be published. Required fields are marked *

seventeen + nineteen =