त्रिविका नवनियुक्त उपकुलपति भन्छन् : समयमै परीक्षा सञ्चालन र नतिजा प्रकाशन मेरो प्राथमिकतामा छ

हिमाल प्रेस ११ फागुन २०८० १४:०७
16
SHARES
त्रिविका नवनियुक्त उपकुलपति भन्छन् : समयमै परीक्षा सञ्चालन र नतिजा प्रकाशन मेरो प्राथमिकतामा छ

काठमाडौँ- त्रिभुवन विश्वविद्यालयका नवनियुक्त उपकुलपति प्रा.डा.केशरजंग बरालले आफ्नो पहिलो प्राथमिकता शैक्षिक क्यालेन्डर निर्माण र त्यसको पूर्ण कार्यान्वयन हुने बताएका छन्।

विश्वविद्यालयको उपकुलपति पदमा नियुक्त भएपछि कुरा गर्दै उनले भने,‘विश्वविद्यालयमा वार्षिक शैक्षिक क्यालेन्डर निर्माण गरी त्यसको पूर्ण कार्यान्वयन अहिलेको आवश्यकता हो। यो मेरो पहिलो प्राथमिकतामा हुनेछ।’ उनले त्रिभुवन विश्वविद्यालय देशको ठूलो संरचनायुक्त संस्था भएको र यसको सुधारका असङ्ख्य काम भएको भन्दै उनले समयमै परीक्षा सञ्चालन र नतिजा प्रकाशनका लागि पनि आफूले काम गर्ने बताए।

‘विश्वविद्यालयले परीक्षा सञ्चालन र नतिजा प्रकाशन समयमै गर्नु निकै आवश्यक छ’,उनले भने,‘यसका अलवा विश्वविद्यालयको पाठयक्रम अद्यावधिक पनि मेरो प्राथमिकतामा हुनेछ।’ विश्वविद्यालयका कुलपति एवं प्रधानमन्त्री पुष्पकमल दाहाल ‘प्रचण्ड’ले बिहीबार त्रिविको रिक्त उपकुलपति पदमा बराललाई नियुक्त गरेका थिए।

शिक्षा, विज्ञान तथा प्रविधिमन्त्री अशोककुमार राई नेतृत्वमा रहेको उपकुलपति छनोट तथा सिफारिस समितिबाट सिफारिस भएका तीनजना उम्मेदवारको ‘मेरिटोक्रेसी’का विषयमा प्रधानमन्त्री दाहालले अध्ययन गरेका थिए।

सिफारिस समितिले विश्वविद्यालयको उपकुलपति नियुक्तिका लागि प्रधानमन्त्री दाहालसमक्ष बरालसहित चित्रबहादुर बुढाथोकी र टंकनाथ धमलालाई सिफारिस गरेको थियो। बराललाई नियुक्ति गर्नुअघि प्रधानमन्त्री दाहालले शिक्षामन्त्री एवं शिक्षा सचिवसँग उनको ‘करिअर’का विषयमा जानकारीसमेत लिएका थिए।

उपकुलपति पदका लागि दर्खास्त दिएका ४३ मध्ये प्रस्तुतिकरण र अन्तर्वार्ताका लागि १४ जना छानिएकामा प्रस्तुतिकरण एवं अन्तर्वार्तापछि नियुक्तिका लागि तीन जनाको नाम सिफारिस गरिएको थियो। शैक्षिक योग्यताको आधार, तालिम, अनुसन्धानमूलक लेख, अन्तर्वार्ता एवं प्रस्तुितकरणका आधारमा नियुक्ति गरिएको जनाइएको छ।


प्रतिक्रिया

Leave a Reply

Your email address will not be published. Required fields are marked *

2 × one =