आमाको आत्मदाह प्रयासमा छोरीको मृत्यु

हिमाल प्रेस ५ फागुन २०८० १४:४४
108
SHARES
आमाको आत्मदाह प्रयासमा छोरीको मृत्यु प्रतीकात्मक तस्बिर।

झापा- बुद्धशान्ति गाउँपालिका-२ गोपालडाँडाकी २८ वर्षीया माया रम्तेलले पाँच वर्षीया छोरी बर्सालाई शरीरमा बाँधेर आत्मदाह गर्दा छोरीको मृत्यु भएको छ। सो प्रयासमा आमा गम्भीर घाइते भएकी छन्।

जिल्ला प्रहरी कार्यालयका प्रहरी निरीक्षक ढुण्डीराज गिरीका अनुसार शुक्रबार बेलुकी साढे ८ बजेतिर मायाले आफ्नै शरीरमा पेट्रोल खन्याइ आगो लगाएकी थिइन्। घटनामा दुवै जना गम्भीर घाइते भएकाले उपचारका लागि बिएन्डसी अस्पतालमा भर्ना गरिएको थियो।

आज बिहान छोरीको मृत्यु भएको र आमा मायाको अवस्था चिन्ताजनक रहेको गिरीले जानकारी दिए। मायाको शरीरको अधिकांश भाग जलेको र घटनास्थल नजिकै उनको ‘सुसाइट नोट’ फेला परेको उनले बताए।

उक्त नोटमा रम्तेलले उनका पति परस्त्रीसँग सम्बन्धमा रहेका कारण बाध्य भई आत्मदाहको निर्णय लिनुपरेको उल्लेख गरेको प्रहरीको भनाइ छ।

प्रहरीले ज्याला मजदुरी काम गर्दै आएका मायाका पति राजन विकलाई नियन्त्रणमा लिएर अनुसन्धान भइरहेको गिरीले बताए।

पति राजन काममा गएको र घरमा ८१ वर्षीया सासूआमा सुन्तलीमाया खाती मात्र रहेको अवस्थामा मायाले छोरीलाई सलले आफ्नो शरीरमा बाँधेर आत्मदाह गरेकी थिइन्।

प्रकाशित: ५ फागुन २०८० १४:४४

प्रतिक्रिया

Leave a Reply

Your email address will not be published. Required fields are marked *

5 × two =