हिमाल प्रेस 
काठमाडौँ– इलाममा धनुषाको जनकपुरदेखि विद्यार्थी लिएर गएको ना ६ ख ८४२४ नम्बरको बस दुर्घटनामा परेको छ। आज आइतबार साँझ पाँच बजे रोङ गाउँपालिका-३ भालुजोडास्थित मेची राजमार्ग सडक खण्डमा बस दुर्घटना भएको हो। दुर्घटनामा एक बालकको मृत्यु भएको इलाका प्रहरी कार्यालय पशुपतिनगरका प्रहरी निरीक्षक विष्णु खड्काले हिमालप्रेसलाई जानकारी दिए। मृतक बालकको पहिचान खुलेको छैन।
‘एक जनाको मृत्यु भएको छ। उनीहरू सबै धनुषास्थित धारापानी गाउँका हुन्,’ उनले भने, ‘घाइतेको उद्धार गरी बीएण्डसी पठाउने काम भएको छ। कसैको पनि नाम खुलिसकेको छैन।’
बस सडकबाट चारसय मिटर तल खसेको उनको भनाइ छ। बसमा ३७ जना सवार थिए। घाइते ३६ जनालाई उद्धार गरी उपचारका लागि बीएण्सी अस्पताल पठाइएको प्रहरीले जनाएको छ। इलामको कन्याम घुमेर झापा फर्किँदै गर्दा बस दुर्घटनामा परेको थियो।
जनकपुरबाट विद्यार्थी लिएर इलाम पुगेको बस दुर्घटना, ३७ जना घाइते
