हिमाल प्रेस 
काठमाडौँ- सरकारी पक्ष र आन्दोलरत नेपाल चिकित्सक संघ पक्षबीच ६ बुँदे सहमति भएको छ। स्वास्थ्य तथा जनसंख्या मन्त्रालयमा दुवै पक्षका टोलीबीच भएको वार्तामा ६ बुँदे सहमति गर्दै आन्दोलरत चिकित्सकको सबै कार्यक्रम फिर्ता भएको हो।
सहमति पत्रमा सरकारी वार्ता टोलीका संयोजक एवं मन्त्रालयका अतिरिक्त सचिव डा. विकास देवकोटा र आन्दोलनरत पक्षबाट चिकित्सक संघका अध्यक्ष डा. अनिलविक्रम कार्कीले हस्ताक्षर गरेका छन्।
सहमतिअनुसार भदौ २७ गते सञ्चो अस्पताल हेटौँडामा कार्यरत रहेका चिकित्सकद्वय डा. विकास थापा र डा. प्रशान्त विडारीमाथि आक्रमणमा संलग्न भएका दोषीहरूलाई तत्काल पक्राउ गर्ने र पक्राउ परेका चार जना, पक्राउ पुर्जी जारी भएका पाँचजनासहित दोषीहरूलाई स्वास्थ्यकर्मी तथा स्वास्थ्य संस्थाको सुरक्षासम्बन्धी ऐन, २०६६ (पहिलो संशोधन ऐन, २०७९) अनुसार कारबाही गरिने भएको छ।
यस्तै स्वास्थ्यकर्मी तथा स्वास्थ्य संस्थाको सुरक्षासम्बन्धी ऐन, २०६६ (पहिलो संशोधन ऐन, २०७९) को प्रभावकारी कार्यान्वयन गर्न सरकारका सरोकारवाला निकायहरू प्रतिबद्ध रहने, सोही ऐन (पहिलो संशोधन ऐन, २०७९) को दफा ५ बमोजिमको स्वास्थ्यकर्मी तथा स्वास्थ्य संस्था सुरक्षा समन्वय समितिलाई स्वास्थ्य मन्त्रालयले सक्रिय बनाउन मासिकरूपमा बैठक बस्ने व्यवस्था गर्ने सहमति भएको छ।
यसै गरी ऐनको कार्यान्वयनका लागि सरोकारवालालाई स्वास्थ्य क्षेत्रको संवेदनशीलतालाई मनन गरी सोहीअनुरूप सचेतनामूलक कार्यक्रम मन्त्रालय र संघले यसै आर्थिक वर्षदेखि सुरु गर्ने, चिकित्सकको सेवा सुविधा, सुरक्षा, जनशक्ति परिचालन, क्षमता अभिवृद्धि तथा विदेशिने प्रवृत्ति कम गर्नेलगायतका समस्या समाधान गर्ने गरी तीन महिनाभित्र चिकित्सक सेवासम्बन्धी विधेयकको मस्यौदा तयार गर्न आवश्यक प्रक्रिया अगाडि बढाउने पनि सहमति भएको छ।
सरकारी वार्ता समितिमा गृह मन्त्रालयका सहसचिव केदारनाथ शर्मा, कानुन न्याय तथा संसदीय मामिला मन्त्रालयका सहसचिव निर्मला अधिकारी, प्रधानमन्त्री तथा मन्त्रिपरिषद् कार्यालयका सहसचिव संगीता ओझा र स्वास्थ्य मन्त्रालयका सहसचिव रमेशकुमार केसी थिए। आन्दोलनरत चिकित्सक संघबाट अध्यक्ष डा. कार्कीसहित उपाध्यक्षद्वय डा. नन्दा गुरुङ, डा. प्रकाश बुढाथोकी, डा. प्रशान्त भट्ट र महासचिव डा. सञ्जीव तिवारी थिए।
आज (आइतबार) अपराह्न १२ बजेदेखि सुरु भएको वार्ता ७ घण्टासम्म चलेको थियो। चिकित्सकमाथिको आक्रमण गर्नेलाई कारबाहीको माग गर्दै आज देशभरिका स्वास्थ्य संस्था आकस्मिक सेवा बाहेकका सबै सेवा संघले बन्द गराएका थिए। रासस
