हिमाल प्रेस 
काठमाडौँ- सरकारले महामारीका रूपमा देशव्यापी फैलिएको लम्पी स्किन रोगबाट प्रभावित किसानलाई राहत दिने प्रक्रिया अगाडि बढाएको छ। मंगलबार बस्ने मन्त्रिपरिषद्को बैठकबाट राहतसम्बन्धी आवश्यक निर्णय गर्ने तयारी गरिएको छ।
प्रधानमन्त्री निवास बालुवाटारमा आज (सोमबार) कृषि तथा पशुपन्छी विकासमन्त्री डा. बेदुराम भुसाललगायत सम्मिलित बैठकमा प्रधानमन्त्री पुष्पकमल दाहाल ‘प्रचण्ड’ ले महामारी प्रभावित किसानलाई राहत दिन र त्यसको आवश्यक गृहकार्य गर्न निर्देशन दिए।
सो अवसरमा प्रधानमन्त्री प्रचण्डले पछिल्लो समय पशुहरूमा देखिएको लम्पी स्किन रोग नियन्त्रण गर्न सरकारले गम्भीर रहेको बताए। लम्पी स्किनको बारेमा यसअघि नै आफूले कृषि मन्त्रालय र अर्थ मन्त्रालयसँग लगातार छलफल गरेको बताउँदै प्रधानमन्त्री दाहालले कृषि र अर्थसँग पशुमा लागेको रोगको विषयमा भएको कुराको प्रचारप्रसार नभएकोसमेत बताए।
लम्पी स्किन रोग यसअघि २ वर्ष अगाडि नै भारत र चीनमा देखिएको उल्लेख गर्दै प्रधानमन्त्री प्रचण्डले यो रोग यसअघि देखिएका छिमेकी देशबाट सिकेर बेलैमा नेपालमा तयारी गर्न नसक्नु कमजोरी भएको बताए। उनले आगामी दिनमा पनि यी र यस्तै समस्या आउन सक्छन् भनेर पूर्व तयारी गर्नुपर्नेमा कृषि मन्त्रालय र पशु सेवा विभागको ध्यानाकर्षण गराए।
उनले चीन र भारतको अभ्यास र विभिन्न अनुसन्धानबाट लम्पी स्किन रोग नियन्त्रणका लागि ‘गोटपक्स भ्याक्सिन’ लगाउनु उपयुक्त देखिएको हुँदा नेपालमा पनि सो खोपको प्रयोग गर्न खुला गर्ने र त्यसमा संघ, प्रदेश र स्थानीय तह परिचालित हुनुपर्ने बताए।
‘गाईभैँसी पाल्ने किसान गरिब र निम्न वर्गका नै हुन्छन्, लम्पी स्किन रोगले सो वर्गका किसानलाई निकै ठूलो समस्यामा पारेको छ। किसानलाई राहत दिने गरी छिट्टै मन्त्रिपरिषद्बाट निर्णय गर्नुपर्छ,’ उनले भने।
किसानलाई राहत दिनुका साथै हाल निःशुल्क रूपमा गोटपक्स भ्याक्सिन संघ, प्रदेश र स्थानीय तहले उपलब्ध गराउने गरी तयारी थाल्न उनले कृषि मन्त्रालयलाई निर्देशन समेत दिए।
लम्पी स्किन रोग नियन्त्रणका लागि खोपको प्रयोगसँगै जनचेतना जगाउन प्रचारप्रसार गर्ने, पशु आहारमा ध्यान दिनेबारे पनि किसानमा सचेतना फैलाउन जोड दिनुपर्ने प्रधानमन्त्री दाहालको भनाइ थियो। यस्तै राहतको मोडालिटीका बारेमा आवश्यक प्रस्ताव तयार पारेर ल्याउन प्रधानमन्त्री प्रचण्ड दाहालले कृषि तथा पशुपन्छी विकास मन्त्रालयलाई निर्देशन दिएका थिए।
यस्तै, सो रोग नियन्त्रणका लागि ‘बर्डफक्स’ नामक खोप निःशुल्क उपलब्ध गराउने भएको छ। हाल प्रयोग भइरहेको खोपभन्दा प्रभावकारी रहेको र विश्व स्वास्थ्य संगठनले समेत सो खोप प्रयोग गर्न अनुमति दिएको तथा नेपालका कृषि तथा पशुविज्ञहरूले दिएको सुझावका आधारमा बर्डफक्स खोप प्रयोग गर्न लागिएको हो।
सो खोप प्रयोगका लागि समेत आवश्यक अनुमति दिन लागिएको कृषि तथा पशुपन्छी विकासमन्त्री डा. भुसालले जानकारी दिए। मन्त्रालयका अनुसार देशभर कुल ११ लाख बढी पशु लम्पी स्किन रोगबाट प्रभावित भएका छन्। तीमध्ये आठ लाख ६७ हजार पशु चौपाया निको भइसकेका छन्।
यस्तै ४८ हजार पशु चौपाया सो रोगका कारण मरेका छन्। हाल एक लाख ८१ हजार पशु चौपाया सो रोगका कारण सक्रिय संक्रमित छन्। पशु चौपाया मर्दा प्रत्यक्ष रूपमा ३० अर्ब रूपैयाँ बराबरको क्षति भएको छ।
यस्तै समग्रमा एक खर्ब बराबरको क्षति भएको सो अवसरमा जानकारी दिइएको थियो। रोगका कारण पशु चौपाया मर्दा कतिपय जिल्लामा धान रोपाइँसमेत प्रभावित भएको छ।
दूध उत्पादनमा समेत असर परेको छ। किसान प्रत्यक्ष रूपमा प्रभावित भएकाले तत्काल राहतको प्रबन्ध गर्नुपर्ने र त्यसका लागि आवश्यक बजेट र मापदण्डको व्यवस्था गनुपर्ने कृषि तथा पशुपन्छी विकास मन्त्रालयका सचिव डा. गोविन्दप्रसाद शर्माको भनाइ छ।
यस्तै प्रधानमन्त्री तथा मन्त्रिपरिषद् कार्यालयका सचिव एकनारायण अर्यालले रोग प्रभावित किसानले प्रत्यक्ष रूपमा राहत पाउने गरी व्यवस्था गर्नुपर्ने बताए। राष्ट्रिय योजना आयोगका उपाध्यक्ष डा. मीनबहादुर श्रेष्ठले किसान प्रत्यक्ष रूपमा मारमा परेकाले उचित राहत दिने विषयमा तत्काल निर्णय गर्नुपर्ने बताए। शुल्क खोप उपलब्ध गराएर थप क्षति हुनबाट रोक्नुपर्ने उनको भनाइ छ। -रासस
