तोकेभन्दा बढी शुल्क लिने संस्थागत विद्यालयलाई कारबाही गर्ने टाेखा नगरपालिकाकाे चेतावनी

हिमाल प्रेस १४ साउन २०८० २१:००
6
SHARES
तोकेभन्दा बढी शुल्क लिने संस्थागत विद्यालयलाई कारबाही गर्ने टाेखा नगरपालिकाकाे चेतावनी

काठमाडाैँ- टोखा नगरपालिकाले तोकेभन्दा बढी शुल्क लिने मातहतका संस्थागत विद्यालयलाई कारबाही गर्ने भएको छ। नगरपालिकाले आइतबार विज्ञप्ति जारी गर्दै विभिन्न मिति र समयमा नगरपालिकाभित्रका संस्थागत विद्यालयको अनुगमन तथा निरीक्षण गर्दा कतिपय विद्यालयले तोकेकोभन्दा बढी शुल्क लिएको पाइएकाले त्यस्ता विद्यालयलाई कारबाही गरिने जानकारी दिएकाे हाे।

नगरपालिका शिक्षा शाखाका अधिकृत खगेन्द्रसिंह धामीले अनुगमनका क्रममा नगरपालिकाले तोकेकोभन्दा बढी शुल्क लिएको, कक्षा ११ को नतिजा समयमै प्रकाशन नगरेको, विद्यालयमा विद्यार्थीमैत्री वातावरण नभएको, शुल्क सम्बन्धमा अभिभावकसँग विवाद रहेको पाइएकाले त्यस्ता विद्यालयलाई कानूनी कारबाही गर्न लागिएको बताए।

अनुगमन तथा निरीक्षणका क्रममा विद्यालयको वातावरण सफासुग्घर नभएको, शैक्षिक सत्र २०८० को शुल्क प्रस्ताव नगरपालिकाको कार्यालयमा पेस नगरेको, अन्य तथा अतिरिक्त शुल्क बढी लिएको, मन्टेश्वरी सञ्चालनका लागि अनुमति लिएर कक्षा ३ सम्म सञ्चालन गरेको पाइएको शिक्षा अधिकृत धामीले बताए।

त्यस्तै, विद्यार्थीअनुसार डेस्क तथा बेन्चको व्यवस्था नभएको, विद्यालय प्रशासन र विद्यार्थीहरूका बीच सुमधुर सम्बन्ध नराखेको, मन्टेश्वरी कक्षाको अनुमति लिई नगरपालिकामा अभिलेखीकरण नगरेको, विद्यार्थीलाई हतोत्साहित हुने प्रकृतिका क्रियाकलाप गरेको, तहअनुसार योग्यता प्राप्त शिक्षक नभएको पाइएकाे उनकाे भनाइ छ। काठमाडौँको उत्तरी क्षेत्रमा रहेको टोखामा ११ वडा रहेका छन्। उक्त नगरपालिकाभित्र हाल ८४ वटा संस्थागत, ९ वटा सामुदायिक र तीन वैकल्पिक विद्यालय रहेका छन्।

प्रकाशित: १४ साउन २०८० २१:००

प्रतिक्रिया

Leave a Reply

Your email address will not be published. Required fields are marked *

20 − three =