हिमाल प्रेस 
पहाडी जिल्लामा पठाउन नेपालगञ्जस्थित साल्ट ट्रेडिङ कर्पोरेशन लिमिटेड प्रदेश कार्यालयमा नुन प्याकिङ गरिँदै। तस्बिर– रासस
नेपालगञ्ज– साल्ट ट्रेडिङ कर्पोरेसन लिमिटेड प्रदेश कार्यालय नेपालगन्जमा गत आर्थिक वर्षको ०७९/८० असार मसान्तसम्म २ हजार ७ सय ८६ क्विन्टल नुन मौज्दात रहेको छ।
कर्णाली प्रदेश, पूर्वीरुकुम, पश्चिम रुकुम र रोल्पामा असार मसान्तसम्म ६ हजार ३ सय ७८ क्विन्टल नुन मौज्दात रहेको प्रदेश कार्यालय प्रमुख महेश चौधरीले जानकारी दिए।
प्रदेश कार्यालय नेपालगन्जमा भारतको गुजरातस्थित खाडाघोडाबाट १ र्याकमा २६ हजार क्विन्टलका दरले वर्षमा ९ र्याक नुन आयात हुने गर्दछ।
दुर्गम क्षेत्रमा सरकारको ढुवानी अनुदानअन्तर्गत प्रत्येक १ वर्ष ३६ देखि ३८ हजार क्विन्टल नुन ढुवानी गरिने उनले जानकारी दिए।
जुम्लामा नुनको कमी हुन नदिन सोमबार मात्रै ३ सय २० क्विन्टल नुन ढुवानी गरिएको उनले बताए।
प्रत्येक नयाँ आर्थिक वर्षका साउनदेखि नयाँ टेन्डरका लागि आह्वान गरिने भएकाले उक्त नयाँ टेन्डरका लागि सम्पूर्ण कागजात काठमाडौँ पठाई सकिएको उनले उल्लेख गरे।
