मुख्यमन्त्री भेलामा प्रधानमन्त्रीले भने : संघीयता कार्यान्वयनको कामलाई व्यवस्थित गरौँ

हिमाल प्रेस १५ असार २०८० १३:१३
8
SHARES
मुख्यमन्त्री भेलामा प्रधानमन्त्रीले भने : संघीयता कार्यान्वयनको कामलाई व्यवस्थित गरौँ

पोखरा- प्रधानमन्त्री पुष्पकमल दाहाल ‘प्रचण्ड’ले सङ्घीयता कार्यान्वयनको जिम्मेवारीलाई तीव्रता र व्यवस्थित रूपमा अगाडि बढाउन सातै प्रदेशका मुख्यमन्त्रीहरूलाई निर्देशन दिएका छन्।

शुक्रबार पोखरामा आयोजित अन्तर प्रदेश मुख्यमन्त्री बैठकको उद्घाटन समारोहलाई सम्बोधन गर्दै प्रधानमन्त्रीले उक्त निर्देशन दिएका हुन्।

‘सर्वप्रथम यस सुन्दर नगरी पोखरामा अन्तर प्रदेश मुख्यमन्त्री बैठक आयोजना गर्नुभएकोमा म गण्डकी प्रदेशका माननीय मुख्यमन्त्री तथा गण्डकी प्रदेश मन्त्रिपरिषद्लाई हार्दिक धन्यवाद दिँदै बैठकको पूर्ण सफलताको कामना गर्दछु,’ उनले भने, ‘नेपालको संविधान जारी भएपछि दोस्रो पटक आयोजना भएको यो बैठकले देशमा सङ्घीय लोकतान्त्रिक गणतन्त्रलाई थप सुदृढ गर्न र प्रदेश प्रदेशबीचको सम्बन्धलाई सबल बनाउन महत्वपूर्ण भूमिका खेल्न सक्ने मेरो विश्वास छ।’

उनले संविधान निर्माणपछि देशमा विभिन्न विकास निर्माण, अर्थतन्त्रसम्बन्धित काम भएको पनि बताए।

‘तीनै तहको दोस्रो कार्यकालको निर्वाचन सम्पन्न भएको छ। सातै प्रदेशको प्रादेशिक राजधानी र नामाकरण भएको छ। राष्ट्रिय प्राकृतिक स्रोत तथा वित्त आयोगको सिफारिसबमोजिम प्रदेश तथा स्थानीय तहमा वित्तीय हस्तान्तरण व्यवस्थित हुँदै गएको छ,’ उनले भने, ‘कर्मचारी समायोजनको काम सम्पन्न भएको छ। संघीयता कार्यान्वयनसम्बन्धी करिब ८० वटा ऐनहरू निर्माण तथा १६५ वटा कानूनहरू संशोधन भएका छन् भने केही महत्वपूर्ण ऐनहरू तर्जुमाका चरणमा छन्।’

प्रचण्डले तीन तहको सरकारबीच कार्यात्मक समन्वय पनि कार्यान्वयनमा रहेको बताए। उनले यसैको लागि भोलि शनिबार पोखरामै राष्ट्रिय समन्वय परिषद्‌‌को पहिलो बैठक बस्ने पनि जानकारी गराए।

प्रधानमन्त्रीकै तहबाट प्रदेश मुख्यमन्त्रीहरूसँग समय-समयमा छलफल र अन्तरक्रिया हुँदै आएको र प्रदेश मुख्यमन्त्रीहरूसमेतको सहभागितामा राष्ट्रिय विकास समस्या समाधान समितिको बैठक गर्ने पद्धतिको विकास गरिएकोसमेत उनको भनाइ छ। मुख्यमन्त्री भेलामा कोशी प्रदेशका मुख्यमन्त्रीबाहेक सबै प्रदेशका मुख्यमन्त्री सहभागी भएका छन्।

प्रकाशित: १५ असार २०८० १३:१३

प्रतिक्रिया

Leave a Reply

Your email address will not be published. Required fields are marked *

20 + 10 =