तनहुँमा बाँदरबाट फलफूल जोगाउन नसकेपछि बेसार खेती

हिमाल प्रेस २६ जेठ २०८० ९:५१
8
SHARES
तनहुँमा बाँदरबाट फलफूल जोगाउन नसकेपछि बेसार खेती फाइल तस्बिर।

तनहुँ– कृषि ज्ञान केन्द्र तनहुँले बाँदरले हैरान पार्न थालेपछि वैकल्पिक बालीका रूपमा बेसार खेतीलाई प्राथामिकता दिएको छ। बाँदरले अन्नबाली र फलफूल खाएर सताउन थालेपछि केन्द्रले बेसार खेती प्रवर्द्धन गर्न लागेको हो।

व्यास नगरपालिका-८ सोतीबेंशीका २० कृषकले २ सय रोपनी जग्गामा बेसार खेती सुरु गरेको कृषि ज्ञान केन्द्रका प्रमुख कुल तिवारीले जानकारी दिए।

यसका लागि कृषकलाई ८५ प्रतिशत अनुदानका रूपमा ४ लाख रुपैयाँ बजेट विनियोजन गरिएको छ।’यस वर्ष परीक्षणका रूपमा बेसार खेती थालेका छौं। बिक्री-वितरण सहजै भए खेती विस्तार गर्दै लैजाने योजना छ,’ उनले भने।

कार्यालयले बजेट विनियोजन गरेपछि आवश्यक बिउ खरिदका साथै कृषकले बेसार राखेर उमाल्ने ड्रम, कुटानीपिसानी गर्ने मेसिन, प्याक गर्ने मेसिनलगायत सामग्रीसमेत खरिद गरिसकेका छन्।

समूहमा आबद्व सदस्यले बेसार लगाउने, गोडमेल गर्नेदेखि बेसार उत्पादनपश्चात धोइपखाली गरी उमाल्ने, कुटानीपिसानी गरेर लेबल टाँस गरी अग्र्यानिक बेसारका रूपमा बिक्री गर्नेछन्।

व्यास नगरपालिका कार्यालयले व्यास-३ अनसन चौतारीनजिक निर्माण गरेको कक्षमा ल्याएर कृषकले बिक्री गर्ने शर्तमा कार्यालयले यस कार्यक्रमलाई अघि बढाएको हो। उत्पादित वस्तुलाई स्थानीय, प्रदेश र सङ्घीय सरकारको सहयोगमा प्याक गरेर विदेश निर्यात गर्ने लक्ष्य छ।

कार्यालयले कृषकलाई जग्गा बाँझो नराख्न र आयआर्जन गरी आत्मनिर्भर बनाउन बेसार (हलेदो) खेती प्रवर्द्धन कार्यलाई प्राथामिकता दिएको हो। उत्पादन भएका वस्तु स्थानीय बजारमा बिक्री भएन भने ३ वटै तहका सरकारले सहजीकरण गरी बिक्री-वितरणमा सहयोग गरेको अवस्थामा कार्यक्रम अझ प्रभावकारी हुने देखिन्छ।

प्रकाशित: २६ जेठ २०८० ९:५१

प्रतिक्रिया

Leave a Reply

Your email address will not be published. Required fields are marked *

3 × 5 =