प्रधानमन्त्री प्रचण्ड र भारतीय समकक्षी मोदीबीच भेटवार्ता

काठमाडौँ- चारदिने औपचारिक भारत भ्रमणमा रहेका प्रधानमन्त्री पुष्पकमल दाहाल ‘प्रचण्ड’ र भारतीय समकक्षी नरेन्द्र मोदीसँग भेटवार्ता भएको छ। उनीहरूबीच हैदरावाद हाउसमा भेटवार्ता भएको हो।

अहिले प्रचण्ड र मोदीबीच भेटवार्ता जारी छ। यसपछि सम्झौतापत्रमा हस्ताक्षर, केही परियोजनाको उद्घाटनपछि आयोजना हुने पत्रकार सम्मेलनमा दुवै प्रधानमन्त्रीले सम्बोधन गर्ने कार्यसूची छ।

प्रचण्ड यसअघि महात्मा गान्धीको समाधिस्थल राजघाट पुगेर पुष्पहार अर्पण गरेका थिए।

प्रधानमन्त्रीले बिहीबार नै भारतका उपराष्ट्रपति जगदीप धनखड र भारतीय राष्ट्रपति द्रौपदी मुर्मूसँग शिष्टाचार भेट गर्ने कार्यक्रम पनि तय भएको सचिवालयले जनाएको छ। प्रचण्डले साँझ होटल मौर्यमा नेपाल र भारतका उद्योगी, व्यवसायीलाई सम्बोधन गर्नेछन्।

हिजो प्रचण्डले भारतीय प्रधानमन्त्री नरेन्द्र मोदीका राष्ट्रिय सुरक्षा सल्लाहकार अजित डोभालसँगको भेटवार्ता गरेका थिए। प्रचण्ड प्रधानमन्त्री बनेको ५ महिनापछि भारत भ्रमणमा निस्किएका हुन्।

शुक्रबार उनी मध्यप्रदेश जाने र शनिबार त्यहाँबाट दिल्ली आएर स्वदेश फर्कने तयारी रहेको छ।