पूर्वाधार निर्माणसँगै व्यवस्थित बन्दै बाग्लुङको हरिचौर बजार

बाग्लुङ– हरिचौर बजार बाग्लुङको पुरानो जिल्ला सदरमुकाम हो। साँघुरा ठाउँमा अव्यवस्थित बस्ती। यसले गर्दा बजारको सौन्दर्यता हराउँदै गएको छ। तर गलकोट नगरपालिकाले बजारको सौन्दर्यलाई जोगाइराख्न व्यवस्थित बजारका रूपमा विकास गरिरहेको छ।

बजार क्षेत्रमा आवश्यकपर्ने पूर्वाधारसमेत निर्माण गर्न थालेको छ। सार्वजनिकस्थलमा खानेपानी, शौचालय, बालउद्यानलगायतका संरचना निर्माणमा नगरपालिकाले ध्यान दिएको छ।

नगरपालिले चालु आर्थिक वर्षमा बालबालिका र वृद्धवृद्धालाई लक्षित गरी वडा ६ हरिचौरमा बालउद्यान निर्माण गर्न थालेको छ। नगरपालिकाले चालु आर्थिक वर्षमा विनियोजन गरेको छ लाखले उद्यान निर्माणको सुरु गरेको छ।

नगरपालिकालाई बालमैत्री नगर घोषणा गर्नका लागि हरेक वडामा बालउद्यानलगायतका संरचना आवश्यक हुनेहुँदा हरिचौरमा यस वर्ष उद्यान निर्माण गर्न थालिएको वडाध्यक्ष पवन हमालले बताए। उनले बजारनजिकैको २ रोपनी सार्वजनिक जग्गामा बालउद्यान निर्माण गर्न थालेको जानकारी दिए।

बालउद्यानसँगै ढल व्यवस्थापनलगायतका कामसमेत गरिरहेको छ। बालउद्यानका लागि यस वर्ष जग्गा व्यवस्थापन गरी सम्याएर संरचना निर्माण गर्न थालिएको अध्यक्ष हमालको भनाइ छ। उद्यानसँगै बगैँचासमेत व्यवस्थापन गरिनेछ। अहिले उद्यानमा बालबालिकाका लागि खेल्ने सामग्री राखिएको उनले बताए।

अहिलेसम्म बजार क्षेत्रमा कुनै पनि तनाव व्यवस्थापन गर्ने स्थल नभएको भन्दै वडा कार्यालयले छोटो समय भए पनि भुल्ने स्थान बनाउन थालेको अध्यक्ष हमाल बताउँछन्। आफूहरूले हरिचौर बजारलाई समेत थप व्यवस्थित र बालमैत्री बजारका रूपमा विकास गर्न थालिएको उनको भनाइ छ।

‘यस वर्षदेखि हामीले बजार व्यवस्थापन गर्नुका साथै बालउद्यान निर्माण गर्न थालेका छौं, बजार तीव्र रूपमा विस्तार हुँदैछ। दिनदिनै भिडभाड हुने हुँदा शान्त हुने ठाउँको अभाव पनि छ। यसले गर्दा मान्छेलाई एकैछिन भए पनि फ्रेस हुन र मनलाई शान्त पार्नका लागि बालउद्यान निर्माण गरेका हौं’, अध्यक्ष हमालले भने, ‘खासगरी बालबालिका र वृद्ध वृद्धालाई लक्षित गरी यो निर्माण गरेका हौं, यस वर्ष केही काम भएको छ। आगामी वर्षको बजेटले पूर्णता दिनेछौं, उद्यानमा फूलबारी हुनेछ। बालबालिका खेल्ने सामग्री अहिले नै राखेका छौं थप सामग्री व्यवस्थापन गर्दै जानेछौं।’

हरिचौर बजार क्षेत्र अव्यवस्थित हुँदा आगन्तुक तथा स्थानीयलाई समस्या हुने गरेको भन्दै अब बन्ने सबै संरचना मापदण्डअनुसार निर्माण हुने र हरिचौरलाई जिल्लाकै उत्कृष्ट बजारका रूपमा विकास गर्ने उनले जनाए। यहाँ रहेका साँघुरो र अप्ठ्यारो सडकमा बेलाबेला दुर्घटना हुने गरेको भन्दै अहिले ढलान गरेको उनको भनाइ छ।

गलकोट नगरपालिकाका प्रवक्ता हिम भण्डारीले हरिचौर बजारको सौन्दर्यकरण गरी व्यवस्थित बजार बनाउन नगरपालिकाले मापदण्ड बनाएको बताए। बजारमा तीव्र रूपमा भवनहरू बनिरहेको भन्दै अब निर्माण हुने सबै संरचना नगरपालिकाले बनाएको मापदण्डअनुसार बनाउनुपर्ने प्रवक्ता भण्डारी बताउँछन्।

यहाँ ऐतिहासिक गलकोट दरबार रहेकाले हरिचौर हुँदै पर्यटकीयस्थल टेउवाको मूर्तिकला पुगिने हुँदा बजारमा विभिन्न संरचना बनाउन थालिएको उनको भनाइ छ।

‘हरिचौर बजार पर्यटकीय हिसाबले निकै सम्भावना बोकेको ठाउँ हो, यहाँ दैनिक आन्तरिक पर्यटक घुम्न आउने गर्छन्, यहाँको गलकोट दरबार र टेउवाको मूर्तिकला हेर्न आउने पर्यटकले एकैछिन थकान मेटाउनका लागि र बालबालिकालाई रिफ्रेसमेन्ट गराउनका लागि पार्क निर्माण भएको छ, अहिले सामान्य रूपमा निर्माण भए पनि यसलाई थप व्यवस्थित बनाउने योजना छ,’ प्रवक्ता भण्डारीले भने। -रासस