हिमाल प्रेस 
झापा- भारतसँग सीमा जोडिएको झापा र मोरङ जिल्लाको दशगजा क्षेत्र खाली गराउन र ढलेका सीमास्तम्भहरू मर्मतसम्भार गर्न दुवै देशका सीमावर्ती जिल्लाका प्रशासकहरू सहमत भएका छन्। नेपाल-भारत सीमावर्ती जिल्ला समन्वय समिति (बीडीसीसी)को सोमबार भारतको किसनगञ्जमा सम्पन्न बैठकमा दशगजा क्षेत्रमा रहेका खेतीपाती र घरटहरा हटाउने सहमति भएको हो।
बैठकमा नेपाली टोलीको नेतृत्व मोरङका प्रमुख जिल्ला अधिकारी वीरेन्द्रकुमार यादव र भारतीय टोलीको नेतृत्व विहार प्रान्तको किसनगञ्ज जिल्लाका मजिस्ट्रेट श्रीकान्त शास्त्रीले गरेका थिए।
बैठकपछि बैठकबारे जानकारी दिँदै किसनगञ्जका जिल्ला मजिस्ट्रेट शास्त्रीले दुवै देशको सीमाको दशगजा क्षेत्र अतिक्रमणमुक्त गराउने विषयमा सहमति भएको बताए।
नदीले बगाएका, पुरेका र हराएका सीमास्तम्भहरूको खोजी गरी यथास्थानमा पुनःस्थापना गर्ने सहमति समेत भएको उनले बताए। ‘दशगजा क्षेत्र खाली गराउने र क्षतिग्रस्त सीमा स्तम्भहरूको मर्मत गर्न हामी दुवै देशका जिल्ला प्रशासकहरु सहमत भयौँ,’ उनले भने।
बैठकमा नेपाली टोली प्रमुख मोरङका प्रमुख जिल्ला अधिकारी यादवले दुवै देशका सीमा क्षेत्रका अधिकारीबीच १४ वटा विषयमा छलफल भएको बताए।
हात्ती आतंक, लागूऔषध कारोबार, मानव तस्करी, चोरी निकासीलगायत महत्त्वपूर्ण विषयमा नियन्त्रणका लागि भारतीय पक्षलाई आग्रह गरिएको उनले जानकारी दिए। ‘सीमा क्षेत्रमा भइरहेका समस्याबारे हामीले भारतीय पक्षको ध्यानाकर्षण गरायौँ,’ उनले भने, ‘हात्ती आतंक, लागूऔषधको कारोबार, मानव बेचबिखन, चोरी निकासीजस्ता आपराधिक घटना नियन्त्रणमा सहकार्य गर्न उहाँहरू सहमत हुनुभयो।’
बैठकमा भारतीय पक्षबाट सीमा क्षेत्रमा हुनसक्ने आतंककारी गतिविधि, हतियार तस्करी, नक्कली नोट, मदिरा र गाईवस्तु तस्करीलगायत समस्यामा नेपाली पक्षको ध्यानाकर्षण गराइएको थियो। सीमा क्षेत्रमा सवारीसाधनको नियमित चेकजाँच, अपराधी पक्राउका लागि सूचनाको आदानप्रदान गर्ने विषयमा समेत बैठकमा छलफल भएको झापाका प्रहरी उपरीक्षक दुर्गाराज रेग्मीले बताए।
सशस्त्र सीमा बल (एसएसबी)को १९औँ बटालियनको ठाकुरगञ्जस्थित कार्यालयमा उक्त बैठक भएको थियो। बैठकमा नेपाली पक्षबाट झापाका सहायक प्रमुख जिल्ला अधिकारी विश्वराज नेपाल, मोरङका सहायक प्रजिअ शरदकुमार पोखरेल, सशस्त्र प्रहरी बलको २ नं गणका गणपति देवराज अर्याल, झापाका प्रहरी उपरीक्षक रेग्मी, मोरङका प्रहरी उपरीक्षक दीपक पोखरेललगायतको सहभागिता थियो।
भारतसँग झापाको १ सय १८ किलोमिटर र मोरङको ५३ किलोमिटर सीमा क्षेत्र जोडिएको छ। रासस
