६ करोडको एडिडास जुत्तासहित तीनवटा ट्रक नियन्त्रणमा

मकवानपुर- सशस्त्र प्रहरीले मकवानपुरबाट एडिडास जुत्तासहितको तीनवटा ट्रक नियन्त्रणमा लिएको छ। हेटौँडा उपमहानगरपलिका–१५, पूर्वपश्चिम लोकमार्गबाट वैशाख २९ गते सशस्त्र प्रहरी नम्बर १४ गण मकवानपुरले ट्रकहरू नियन्त्रणमा लिएको हो।

अमेरिकी डलर ४ लाख ८८ हजार १७३.६३ (६ करोड ४२ लाख २९ हजार ४ रुपैयाँ ५० पैसा) मूल्य लेखिएको प्रज्ञापनपत्रसहित ना ३ ख ७४५०, ना ३ ख ७६५८ र ना ३ ख ७७५० नम्बरको ट्रकमा लोड भएको एडिडास सुपरस्टार जुत्ताको बिल बिजक शंकास्पद रहेको भन्ने सूचनाका आधारमा नियन्त्रणमा लिइएको सशस्त्र प्रहरीले जनाएको छ।

नियन्त्रणमा लिएको जुत्ता र तीनवटै ट्रक आवश्यक अनुसन्धान तथा कारबाहीका लागि राजस्व अनुसन्धान विभाग हरिहर भवन ललितपुरमा बुझाइएको छ।