स्ववियु निर्वाचन बिथोलिएका क्याम्पसमा चैत ३० गते मतदान हुने

हिमाल प्रेस २३ चैत २०७९ १०:१३
4
SHARES
स्ववियु निर्वाचन बिथोलिएका क्याम्पसमा चैत ३० गते मतदान हुने पुल्चोक इन्जिनियरिङ क्याम्पसमा भएको स्ववियु निर्वाचन। फाइल तस्बिर।

काठमाडौँ- चार विद्यार्थी संगठनबीच त्रिभुवन विश्वविद्यालय (त्रिवि) का बाँकी रहेका क्याम्पसमा स्वतन्त्र विद्यार्थी युनियन (स्ववियु) निर्वाचन चैत ३० गते गर्ने सहमति भएको छ। उनीहरूले निर्वाचन बिथोल्ने कुनै पनि गतिविधि नगर्ने प्रतिबद्धता जनाएका छन्।

नेपाल विद्यार्थी संघका अध्यक्ष दुजाङ शेर्पा, अनेरास्ववियुका अध्यक्ष समिक बडाल, अनेरास्ववियु ९क्रान्तिकारी०का अध्यक्ष पञ्चा सिंह र नेकपा (एस) निकट अनेरास्ववियूका अध्यक्ष सुदेश पराजुलीले आज संयुक्त रूपमा विज्ञप्ति जारी गर्दै चैत ५ गते स्ववियु निर्वाचन हुन नसकेका त्रिविका आंगिक र सम्बन्धन प्राप्त क्याम्पसमा चैत ३० गते निर्वाचन गराउन सहमति गरेका छन्।

‘देशभरि निर्वाचन हुन बाँकी रहेका आंगिक र सम्बन्धन प्राप्त क्याम्पसमा निर्वाचन गर्ने, निर्वाचन बिथोलिने खालका गतिविधि नगर्ने र निर्वाचन भाँड्ने गरी कुनै पक्षबाट तालाबन्दी गरियो भने प्रशासनको सहयोगमा ताला तोडी चुनावी प्रक्रिया अगाडि बढाउन प्रतिबद्ध छौँ,’ संयुक्त रूपमा जारी गरिएको विज्ञप्तिमा उल्लेख छ। भर्ना विवादका कारण स्ववियु निर्वाचन रोकिएका क्याम्पसमा विवादित विषयमाथि सत्यतथ्य छानबिनका लागि अध्ययन र अनुगमन गर्न विश्वविद्यालयको केन्द्रीय अनुगमन समितिलाई अनुरोध गरी निर्वाचन प्रक्रिया अगाडि बढाउनसमेत उनहरूले माग गरेका छन्।

उपत्यकाका अमृत साइन्स, त्रिचन्द्र, पाटन संयुक्त क्याम्पस, विश्वभाषा, रत्नराज्य र नेपाल कमर्स क्याम्पसमा निर्वाचन प्रक्रिया रोकिएको छ। यस्तै उपत्यकाबाहिर पृथ्वीनारायण क्याम्पस, पश्चिमाञ्चल इन्जिनियरिङ क्याम्पस, पोखरा नर्सिङ क्याम्पस, ठाकुरराम बहुमुखी क्याम्पस वीरगन्ज, वीरेन्द्र बहुमुखी क्याम्पस चितवन, चितवन इन्जिनियरिङ क्याम्पस र सिद्धनाथ बहुमुखी क्याम्पसमा निर्वाचन गर्न बाँकी छ। चैत ५ गते १४ वर्षपछि त्रिविका अधिकांश क्याम्पसमा स्ववियु निर्वाचन सम्पन्न भएको थियो।

केही क्याम्पसमा भर्ना र विद्यार्थी संगठनबीच विवादका कारण निर्वाचन हुन सकेको थिएन।

प्रकाशित: २३ चैत २०७९ १०:१३

प्रतिक्रिया

Leave a Reply

Your email address will not be published. Required fields are marked *

4 × five =