राष्ट्रपतिमा राष्ट्रिय सहमति होस् भनेर सरकारलाई समर्थन गरेका हौँ : कांग्रेस प्रवक्ता

हिमाल प्रेस १२ माघ २०७९ १३:०२
8
SHARES
राष्ट्रपतिमा राष्ट्रिय सहमति होस् भनेर सरकारलाई समर्थन गरेका हौँ : कांग्रेस प्रवक्ता

बाँके- नेपाली कांग्रेसका प्रवक्ता डा. प्रकाशशरण महतले राष्ट्रिय सहमतिका लागि कांग्रेसले सरकारलाई समर्थन गरेको बताएका छन्।

नेपाल प्रेस युनियन, बाँकेले बिहीबार आयोजना गरेको पत्रकार भेटघाटमा उनले सभामुख, राष्ट्रपतिलगायतको निर्वाचनमा राष्ट्रिय सहमति होस् भनेर सरकारको समर्थन गरेको बताएका हुन्।

‘प्रधानमन्त्रीको आग्रहमा राष्ट्रिय सहमतिका लागि कांग्रेसले पनि सरकारलाई विश्वासको मत दिएको हो तर कांग्रेस सरकारमा जान होइन,’ उनले भने, ‘संसद्मा गुण र दोषका आधारमा हामीले संसद्मा सशक्त प्रतिपक्षको भूमिका निर्वाह गर्छौँ, सरकारलाई समर्थन गरे पनि हामीहरू सरकारमा जाने भनेको होइन। ’

नेपाली कांग्रेस नेता डा. महतले प्रधानमन्त्री पुष्पकमल दाहाल ‘प्रचण्ड’ले संविधान रक्षाका लागि ‘म उभिन्छु र समझदारी निर्माण गर्छु’ भन्ने मनसाय राखेको र समझदारी विकास गर्ने भनेकाले प्रचण्डको त्यो प्रतिबद्धताको परीक्षण गर्न पनि कांग्रेसले सरकारलाई समर्थन गरेको बताए।

संविधान रक्षाको जिम्मेवारी राष्ट्रपतिको पनि भएकाले त्यसमा कांग्रेसको दाबी रहेको उनले उल्लेख गरे। पार्टीले विगतमा प्रधानमन्त्रीमा नेतृत्व दाबी गर्दा गठबन्धन विभाजन हुने उद्देश्य नरहेको र केही राजनीतिक मूल्यांकनमा त्रुटि भएकाले गठबन्धन भत्केको उनको भनाइ छ।

प्रवक्ता महतले राष्ट्रपतिमा कांग्रेसको दाबी रहेको तर कांग्रेस सभापति शेरबहादुर देउवा राष्ट्रपतिको उम्मेदवार नभएको पनि स्पष्ट पारे। उनले राष्ट्रपतिका लागि पार्टीका वरिष्ठ नेता रामचन्द्र पौडेललगायतका नेता इच्छुक रहेकाले उपयुक्त समयमा पार्टीले निर्णय गर्ने पनि बताए।

प्रकाशित: १२ माघ २०७९ १३:०२

प्रतिक्रिया

Leave a Reply

Your email address will not be published. Required fields are marked *

twenty + eight =