भक्तपुरको एक घरमा विस्फोट

काठमाडौँ- भक्तपुरको एक घरमा सोमबार बिहान विस्फोट भएको छ। सूर्यविनायक नगरपालिका–३, दधीकोटमा रहेको रामप्रसाद थपलियाको घरमा विस्फोट भएको हो।

भान्सामा आगो बाल्ने क्रममा एक्कासि विस्फोट भएको भक्तपुर प्रहरी परिसरका डीएसपी राजु पाण्डेले जानकारी दिए। विस्फोटबाट घरको पर्खाल भत्किएको छ भने पार्किङमा राखिएको कारको सिसा फुटेको छ।

यद्यपि मानवीय क्षति भने नभएको डीएसपी पाण्डेले जानकारी दिए। ‘चुल्हो बाल्ने क्रममा विस्फोट भएको हो, थपलियाकी श्रीमती सामान्य घाइते हुनुभएको छ,’ उनले भने, ‘अहिले अनुसन्धानका लागि नेपाली सेना, डग (कुकुर) टोली पनि परिचालन गरिएको छ।’

प्रारम्भिक अनुसन्धानअनुसार ग्यास लिक भएको र सो ग्यास पड्किएको डीएसपी पाण्डेले बताए। ‘सिलिन्डर पड्किएको होइन। ग्यास लिक भएर कोठाभरि फैलियो, लाइटर बाल्ने क्रममा विस्फोट भएको हुन सक्ने देखिएको छ,’ उनले भने, ‘हामी अनुसन्धान गरिरहेका छौँ।’