सानिमा बैंकले १० प्रतिशत बोनस सेयर दिने

काठमाडौँ– सानिमा बैंक लिमिटेडले १० प्रतिशत बोनस सेयर दिने भएको छ। आइतबार भएको बैंकको १८औँ वार्षिक साधारणसभाले चुक्ता पुँजीको १० प्रतिशत बोनस सेयर र ०.९८ प्रतिशत नगद लाभांश दिने प्रस्ताव पारित गरेको हो।

१८औँ साधारणसभाले बैंकमा सर्वसाधारण समूहको तर्फबाट दुईजना सञ्चालक पनि निर्वाचित गरेको छ। समितिमा आशुतोष उपाध्याय र रमेशकुमार पोखरेल सञ्चालक चयन भएका छन्।

आर्थिक वर्ष ०७८/७९ मा सानिमा बैंकले २ अर्ब ९ करोड खुद मुनाफा गरेको थियो। बैंकको कुल सम्पत्ति १ खर्ब ९२ अर्ब ५१ करोड र कुल निक्षेप १ खर्ब ५८ अर्ब ८८ करोड रहेको छ। आव ०७८/७९ सम्म बैंकको खुद कर्जा सापटी १ खर्ब ४१ अर्ब ६९ करोड रहेको छ। आव ०७७/७८ को तुलनामा निक्षेप, कर्जा सापटी र कुल सम्पत्तिमा क्रमशः २१.३९, १५.०४ र १९.७५ प्रतिशतले वृद्धि भएको छ।