सञ्चय कोषको प्रमुख प्रशासकमा धिताल नियुक्त

हिमाल प्रेस २१ मंसिर २०७९ १८:२०
346
SHARES
सञ्चय कोषको प्रमुख प्रशासकमा धिताल नियुक्त

काठमाडौँ- कर्मचारी सञ्चय कोषको प्रमुख प्रशासकमा जितेन्द्र धिताल नियुक्त भएका छन्।  मंगलबार बसेको मन्त्रिपरिषद्को बैठकले सञ्चय कोषको प्रमुख प्रशासकमा धिताललाई नियुक्त गरेको सूचना तथा सञ्चार प्रविधिमन्त्री ज्ञानेन्द्रबहादुर कार्कीले जानकारी दिए। धिताल यसअघि कोषको निमित्त प्रशासक थिए।

चार्टर्ड अकाउन्टेन्ट (सीए) धिताल गोरखाका स्थायी बासिन्दा हुन्। अर्थशास्त्र तथा सूचना प्रविधिमा समेत स्नात्तकोतर गरेका धिताल सीएको अध्ययन लगतै सञ्चयकोषमा प्रवेश गरेका थिए। सञ्चय कोषले कात्तिकमै प्रशासकको लागि सूचना जारी गरेपछि तीन जनाले आवेदन दिएका थिए। त्यसमध्ये धिताल विभिन्न प्रक्रिया पार गर्दै प्रशासकमा नियुक्त भएका हुन्। निर्वाचन आचारसंहिताका कारण नियुक्ति प्रक्रिया केही ढिला भएको हो।

यो वर्ष कर्मचारी सञ्चय कोष ६१ वर्षमा लागेको छ। कोषले सरकारी र निजी क्षेत्रका कर्मचारीको सेवाअवधि र अवकासपछिको वित्तीय सुरक्षाको काम गर्दै आएको छ। कोषले यो वर्ष फिलिपिन्समा रहेको एसिया प्यासिफिक क्षेत्रका डेभलपमेन्ट फाइनासिङ संस्थाहरूको संगठन एडीफ्यापबाट ‘टेक्नोलोजी डेभलपमेन्ट’अन्तर्गतको अवार्डसमेत पाएको छ। साथै लामो समयदेखि अन्तर्राष्ट्रिय सामाजिक सुरक्षा संस्थाको एसोसिएट सदस्य रहेको कोष यही वर्षदेखि स्थायी सदस्य बनेको छ।

कोषले सञ्चयकर्ताका ससाना आवश्यकता विशेषतः आवास, शिक्षा, स्वास्थ्यको क्षेत्रमा तथा देशको आर्थिक विकासका लागि ठूला पूर्वाधार आयोजनामा लगानीसमेत गर्दै आएको छ।

प्रकाशित: २१ मंसिर २०७९ १८:२०

प्रतिक्रिया

Leave a Reply

Your email address will not be published. Required fields are marked *

2 × two =